Azərbaycan, Bakı, 9 avqust /Trend, müxbir H.Vəliyev/
Azərbaycanın "Azerfon" MMC mobil rabitə operatoru Quba, Xaçmaz və Lənkəranda yeni baza stansiyalarının quraşdırılması üzrə işləri başa çatdırıb. Bu barədə Trend-ə "Azerfon" şirkətinin korporativ əlaqələr üzrə meneceri Elşad Fərzəliyev məlumat verib.
"3G" avadanlıqlarının quraşdırılması operatora bu regionların əhalisinə ənənəvi səs xidmətləri ilə yanaşı, məlumatların sürətli ötürülməsi, mobil televiziya, videozənglər və digər rabitə xidmətləri göstərməyə imkan verir.
Fərzəliyevin sözlərinə görə, "3G" "Azerfon-Vodafone"nun abonent bazası günbəgün artır. Bunu yeni xidmət və məhsulların mərhələli tətbiqi, eləcə də tariflərin aşağı salınması sübut edir.
"Azerfon" operatorunun "3G" şəbəkəsi Bakı, Abşeron yarımadası və Sumqayıtla yanaşı, Gəncə, Şirvan, Naxçıvan, Mingəçevir, Şəki, Tovuz və Şəmkirdə də fəaliyyət göstərir. Üçüncü nəsil şəbəkənin respublikanın bütün ərazisində genişləndirilməsi şirkətin gələcək planlarına daxildir.
"Azerfon" şirkətinin "3G" şəbəkəsinin məlumatlarıötürmə sürəti 7,2 mbit/saata çatır ki, bu da multimedialı kontentin operativ yüklənməsinə, yüksəksürətli İnternetə, elektron poçta çıxışa və əlavə faylların mübadiləsinə imkan verir. "3G" şəbəkəsinin istifadəçiləri mobil telefon vasitəsilə böyük həcmdə məlumatları və videotəsvirləri qəbul edə və ötürə bilərlər.