Azərbaycan, Bakı, 9 dekabr /Trend, müxbir H.Vəliyev/
Regional İnnovasiya Texnologiyaları Akademiyası (RİTA) İKT sahəsində fəaliyyət göstərən Azərbaycanın müəssisələri ilə əməkdaşlıq edərək informasiya-kommunikasiya sahəsində araşdırmalar aparan Avropa İttifaqının 20 müəssisəsinə kömək edib. Bu barədə Trend-ə RİTA-ın direktoru Tofiq Babayev deyib.
Onun sözlərinə görə, işlər EXTEND - Avropa İttifaqı, Şərqi Avropa və Cənubi Qafqaz ölkələri arasında İKT sahəsində tədqiqat əməkdaşlığının genişləndirilməsi layihəsi çərçivəsində aparılır.
Layihə dörd blokdan (Cooperation, Capacities, People və Idea) ibarətdir və praktiki olaraq elmin bütün sahələrini əhatə edir.
Layihənin Azərbaycandakı əlaqələndiricisi Regional İnnovasiya Texnologiyaları Akademiyasıdır. Azərbaycanda layihə 2011-ci ilin iyulunda başa çatacaq Aİ-nin elmi-tədqiqat və texnoloji inkişaf proqramının yeddinci çərçivəsində həyata keçirilir.
Azərbaycanda həyata keçirilən layihə 10 istiqamət üzrə bölüşdürülən "Cooperation" blokuna daxil edilib. Onun əsas istiqamətlərindən biri İKT sahəsidir.
Layihə 2009-cu ilin yanvarında start götürüb və 2011-ci ilin iyulunda başa çatacaq. Layihənin əsas məqsədi İKT sahəsində fəaliyyət göstərən yerli müəssisələrə Avropa İttifaqının elmi-tədqiqat müəssisələri ilə əməkdaşlıqda kömək göstərməkdir.
"Bu gün Cənubi Qafqaz ölkələrində, Belarus, Moldova və Ukraynada İKT sahəsində 2010-2015-ci illəri əhatə edən elmi tədqiqatların əsas istiqamətləri müəyyən edilib. Bilavasitə İKT-yə gəldikdə, bu sahə üzrə səhiyyə, kosmik sənaye, nanotexnologiya, təhsil və s. kimi sahələri əhatə edən 30 istiqamət müəyyən edilib. Ekspertlərin sorğusunu aparırıq, aydınlaşdırırıq, onlarla məsləhətləşirik, təbii ki, onlara çərçivə proqramları və onların istiqaməti haqqında məlumat veririk. Biz İKT sahəsində fəaliyyət göstərən Azərbaycan müəssisələrinin Avropa İttifaqının 20 tədqiqat müəssisəsi ilə əməkdaşlığına kömək edə bilmişik. Bundan başqa, biz tərəfdaşların axtarılması sistemini idarə edirik və Avropa layihələrində iştirak etmək üçün pulsuz məsləhətləşmələr aparırıq", - Babayev əlavə edib.