Azərbaycan, Bakı, 24 yanvar /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Bakı Telefon Rabitəsi" İstehsalat Birliyinin şəbəkəsində beynəlxalq trafikin həcmi 3 Qbit/saata çatıb. Bu barədə bazar ertəsi İB-nin baş direktoru Beytulla Huseynov deyib.
Onun sözlərinə görə, bu göstərici 2005-ci ildə 20 Mbit/saat, 2006-cı ildə - 60 Mbit/s, 2008-ci ildə - 155 Mbit/s təşkil edib. 2011-ci ilin sonuna operatorun şəbəkəsi daxilində buraxılış qabiliyyəti 10 Qbit/saata çatacaq.
Bu günə "Bakı Telefon Rabitəsi"nin genişzolaqlı internet şəbəkəsində aktiv istifadəçilərin sayı 81 min təşkil edir ki, bu da operatorun nömrə tutumunun ümumi sayının 15 faizini təşkil edir. İlin sonuna kimi, Huseynovun sözlərinə görə, qoşulmaların sayı 100 min ədədə çatacaq.
"2010-cu ildə genişzolaqlı şəbəkənin xidmətlərindən alınan gəlirin həcmi təxminən iki milyon manat təşkil edib. 2011-ci ilin sonuna kimi, bizim proqnozlarımıza görə, bu göstərici 10 milyon manata çatacaq", - Huseynov qeyd edib.
"Bakı Telefon Rabitəsi" rəhbərinin sözlərinə görə, bu gün 700 min ədəd təşkil edən nömrə tutumunun ümumi sayının orta hesabla 200 mini NGN (Next Generation Network) gələcək nəsil şəbəkəsinə köçürülüb. Proqnozlaşdırılır ki, ilin sonuna bu göstərici 400 min nömrəni ötəcək.
Bu günə İstehsalat Birliyi tərəfindən 494/495/438/498 saylı ATS-lərin yenidən qurulması üzrə işlər aparılır. "Bakı Telefon Rabitəsi" şəbəkəsinin tam elektronlaşdırılması üzrə işlər fevralda başa çatacaq.
Azərbaycan Rabitə və İnformasiya Texnologiyaları Nazirliyinin məlumatına görə, "Bakı Telefon Rabitəsi" İstehsalat Birliyinin yenidən qurulmasına və şəbəkəsinin genişlənməsinə 2010-cu il yekunlarına görə, 9,4 milyon manat investisiya qoyulub. Qoyulan vəsaitlərin hesabına operatorun nömrə tutumunun həcmi 79 824 ədəd artırılıb.
