Azərbaycan, Bakı, 1 mart /Trend, müxbir H.Vəliyev/
Azərbaycan Avropa Kosmik Agentliyi, İtaliya, Yaponiya, Almaniya və Kanadanın kosmik agentlikləri ilə kosmik sənaye sahəsində əməkdaşlığa dair ilkin razılığa gəlib. Bu barədə çərşənbə axşamı Trend-ə Azərbaycan Rabitə və İnformasiya Texnologiyaları Nazirliyinin dövlət müəssisələrinin fəaliyyətinin koordinasiyası şöbəsinin müdiri Mirheydər İsmayılov deyib.
İsmayılovun sözlərinə görə, razılıq fevralın ortalarında Vyanada (Avstriya) keçirilən BMT-nin kosmik məkandan dinc məqsədlərlə istifadə üzrə elmi-texniki alt komitəsinin (COPUOS - Committee on the Peaceful Uses of Outer Space) 48-ci sessiyası çərçivəsində əldə edilib.
Azərbaycanın belə tədbirlərdə iştirakının məqsədi dünyanın kosmik ictimaiyyətinin ölkənin bu sahədə apardığı işlər haqqında məlumatlandırılmasından ibarətdir.
Hazırda ölkə COPUOS-da müşahidəçi statusuna malikdir. İsmayılovun sözlərinə görə, gələcəkdə Azərbaycan bu komitənin daimi üzvü olsa, müxtəlif layihələrin həyata keçirilməsinə cəlb edilə bilər. Bu isə nəticədə ölkəni dünya kosmik ailəsinin fəal üzvlərindən birinə çevirə bilər.
"Azərbaycan kosmik sənayenin tikintisində ilk addımlar atır və ona görə iş aparır ki, ABŞ, Yaponiya, Fransa, Almaniya kimi inkişaf etmiş ölkələrlə eyni səviyyədə çıxış etsin. Bir sıra ölkələrin nümayəndələri artıq peykimizin texniki parametrləri ilə maraqlanıblar və gələcəkdə onun resurslarından istifadəyə maraq göstərirlər", - İsmayılov bildirib.
Azərbaycanın ilk "Azerspace" telekommunikasiya peykinin buraxılması 2012-ci ilin sonuna planlaşdırılıb. Peykin orbitə çıxarılması ilə Fransanın "Arianspace" şirkəti məşğul olacaq. "Azerspace" peykinin istehsalçısı qismində ABŞ-ın "Orbital Science Corporation" şirkəti çıxış edir. Peyk Malayziyanın peyk operatoru "MEASAT" şirkətindən icarəyə götürülən 46 dərəcə şərq uzunluğu dairəsində yerləşəcək.
"Azerspace" telekommunilkasiya peyki rəqəmli teleradio yayımı xidmətlərinin göstərilməsi, internet şəbəkəsinə çıxış, məlumatların ötürülməsi, VSAT multiservis şəbəkəsinin, eləcə də hökumət əlaqələrinin yaradılması üçün nəzərdə tutulub. "Azerspace" peyki C diapazonlu 24 transponderlə (tezlik zolağı 4-6 ghz) və Ku diapazonlu 12 transponderlə (tezlik zolağı 11-13 ghz) təchiz olunacaq. Peykin orbitdə istismar müddəti 20 ilə qədər təşkil edəcək.
"Azerspace"in xidmət zonasına Avropa, Mərkəzi Asiya və Afrika ölkələri daxil olacaq.
"Azerspace" milli peykinin buraxılması layihəsinin həyata keçirilməsi telekommunikasiya və rabitə kosmik sistemləri sahəsində yeni texnologiyaları tətbiq etməyə, infromasiya müstəqilliyini təmin etməyə və vahid informasiya məkanını yaratmağa imkan verəcək.
