Azərbaycan, Bakı, 29 mart /Trend, müxbir H.Vəliyev/
Azərbaycan Milli Elmlər Akademiyasının (AMEA) dörd regional elmi müəssisəsi AzScienceNet elmi kompüter şəbəkəsindən istifadə etmək imkanı əldə ediblər. Trend-in məlumatına görə, bu barədə çərşənbə axşamı İnformasiya Texnologiyaları İnstitutunun direktoru Rasim Əliquliyev deyib.
Əliquliyevin sözlərinə görə, regional səviyyədə AzScienceNet şəbəkəsi ilə Gəncə, Lənkəran, Şəki və Naxçıvan Muxtar Respublikasında yerləşən AMEA-nın elmi təşkilatları və institutları əhatə olunub.
"Hazırda elmi şəbəkədən orta hesabla AMEA-nın 40 institut və elmi müəssisəsinin minlərlə əməkdaşı istifadə edə bilir. AzScienceNet şəbəkəsinə iki minə yaxın fərdi kompüter qoşulub, məlumatların ötürülməsi sürəti 80 Mbit/s təşkil edir", - Əliquliyev bildirib.
Perspektivdə elmi kompüter şəbəkəsinin bazasında paylayıcı GRID sisteminin yaradılması, məsafəli tədrisin və "bulud hesablamaları"nın təşkili planlaşdırılır.
"AzScienceNet öz-özlüyündə "Elektron Azərbaycan" üçün platformadır və bu gün bizim işimiz əsasən artıq Milli Elmlər Akademiyasının bir neçə strukturları yanında təşkil edilən və fəaliyyət göstərən "elektron elm"in yaradılmasına yönəlib", - Əliquliyev qeyd edib.
İnformasiya Texnologiyaları İnstitutu (İTİ) AzScienceNet elmi kompüter şəbəkəsinin maddi-texniki bazasını artırmağı planlaşdırır və institut qarşısında duran əsas planlar AzScienceNet şəbəkə infrastrukturunun Trans-Avropa Tədqiqat və Təhsil Şəbəkəsi Assosiasiyası (Trans-European Research and Education Networking Association - TERENA) strukturuna inteqrasiyası və elmi kompüter şəbəkəsinin bazası əsasında yeni xidmət növlərinin tətbiqidir.
