Azərbaycan, Bakı, 8 aprel /Trend, müxbir H.Vəliyev/
Rabitə və İnformasiya Texnologiyaları Nazirliyinin Dövlət Radiotezliklər İdarəsi (DRİ) 6 Hhz-dək tezliklərdə fəaliyyət göstərən qurğuların parametrlərinin ölçülməsini aparacaq. Bu barədə cümə günü Trend-ə DRİ-nin baş mühəndisi İlham Əfəndiyev məlumat verib.
Əfəndiyevin sözlərinə görə, monitorinqlərin keçirilməsi məqsədilə idarə tərəfindən Ukraynanın "Supervuzavtomatika" müəssisəsinin istehsalı olan "Naqlyad A6 EM" texniki radionəzarət mobil kompleksi alınıb.
Qurğu ilə yerində tanış olmaq və onun sınağını keçirmək məqsədilə DRİ mütəxəssisləri qarşıdakı həftədə (10-15 aprel) Xarkov şəhərində yerləşən "Supervuzavtomatika" müəssisəsi ilə tanış olacaqlar. Mobil kompleksin tədarükü yaxın aylarda gözlənilir.
"Tərəfimizdən bu gün istifadə olunan texniki radionəzarət mobil kompleksi 3 Hhz-dək tezliklərin monitorinqinin aparılması üçün nəzərdə tutulub. O da 2007-ci ildə "Supervuzavtomatika"dan alınıb. Yeni qurğu da əvvəlki kimi mobil varinatda "Sobol" avtomobilinin bazasında yaradılıb. O, 6 Hhz-dək tezlik resurslarında monitorinq aparmağa imkan verir ki, buraya CDMA, GSM standartları, internet şəbəkəsinə çıxışın simsiz texnologiyaları və s. daxildir", - Əfəndiyev bildirib.
"Naqlyad A6 EM" qurğusunun tədarükü üzrə müqavilə ötən il imzalanıb. "Supervuzavtomatika" müəssisəsinin satdığı avadanlıqlar radioşüalanmaların aşkar olunması və ölçülməsi, parametrlərdən yayınan radioelektron vasitələrin (REV) aşkar edilməsi, qanunsuz fəaliyyət göstərən REV və maneələrin aşkar edilməsi, onların yerləşdiyi ərazinin müəyyən edilməsi, məlumat bazasının uçotunun aparılması, REV-in elektromaqnit uyğunluğunun planlaşdırılması və s. üçün nəzərdə tutulan seriyalı proqram-qurğu vasitələridir.
Texniki radionəzarət mobil kompleksinin funksional proqram təminatı praktiki olaraq bütün məlum radioqəbuledici qurğuların işini təmin edə bilər.
Əfəndiyevin sözlərinə görə, perspektivdə idarə radiomonitorinqin mərkəzləşdirilmiş sistemini qurmağı planlaşdırır ki, bu da ötürücülərin yerinin və parametrlərinin optimal seçimini təmin etməyə imkan verir.
Monitorinq şəbəkəsinin qurulması efirə radionəzarətin təşkilini, coğrafi relyefinə görə respublikanın efir məkanına təsir edə biləcək respublikadakı teleradioyayım stansiyalarının texniki parametrlərini əks etdirən məlumat bazasının yaradılmasını nəzərdə tutur.
Mərkəzləşdirilmiş avtomatlaşdırılmış radiomonitorinq şəbəkəsinin yaradılması layihəsi 2010-2012-ci illərdə Rabitə və informasiya texnologiyalarının inkişafı üzrə Dövlət Proqramında ("Elektron Azərbaycan") nəzərdə tutulub. Tədbir planına görə, radiomonitorinq şəbəkəsinin yaradılması 2012-ci ildə gözlənilir.