Azərbaycan, Bakı, 19 aprel /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi 2011-ci ilin sonunadək ilk milli peyk - "Azerspace"in sığortaçısını müəyyənləşdirməyi planlaşdırır. Bu barədə Trend-ə çərşənbə axşamı layihəyə yaxın mənbə deyib.
"Layihə üzrə birinci mərhələ başa çatdıqdan sonra Azərbaycan tərəfi sığorta xidmətlərinin göstərilməsi üzrə tender keçirməyi planlaşdırır və potensial sığorta şirkətləri kimi sığorta bazarının böyük dünya oyunçuları nəzərdən keçiriləcək", - mənbə bildirib.
Xarici sığortaçının cəlb edilməsi yerli sığorta şirkətlərində belə böyük riski öz üzərilərinə götürmək imkanının olmaması ilə izah edilir. Bu halda xarici sığorta şirkətlərinin yerli sığortaçılarla tərəfdaşlıqda iştirak imkanı istisna edilmir.
İlkin məlumatlara görə, sığortaçılar üçün şərtlər və tələblərin hazırlanmasına sentyabrda başlanılacaq.
"Azerspace" peykinin tikintisinin dəyəri 120 milyon dollar təşkil edir. Peykin orbitə çıxarılması isə 93 milyon dollara başa gələcək.
Bundan əvvəl Azərbaycanın rabitə və informasiya texnologiyaları naziri Əli Abbasobun dediyinə görə, yaradılmasına 319 milyon dollar vəsait sərf olunması planlaşdırılan peykin (bunun 127 milyon manatı peykin istismar xərcləridir) öz xərcini 6 ilə çıxaracağı nəzərdə tutulub. "Azerspace" milli telekommunikasiya peykinin buraxılışından əldə edilən gəlirlər 495 milyon, Azərbaycanın mənfəət isə 176 milyon manat təşkil edəcək. Əldə olunan gəlir ölkənin texniki inkişafına sərf ediləcək.
Abbasovun sözlərinə görə, "Azerspace" peykinin 2012-ci ilin sonunda orbitə buraxılacağı gözlənilir, bundan sonra növbəti, gələcəkdə isə bir neçə peyklərin buraxılması üzrə layihələrin həyata keçirilməsi planlaşdırılır.
Rabitə Nazirliyinin qarşısında duran prioritet məsələlərdən biri peykin resurslarının satışıdır. Nazirlik "Azerspace"in resurslarının 80 faizini beynəlxalq bazara çıxarmaq, yerdə qalan 20 faizindən isə respublikadaxili səviyyədə istifadə etmək fikrindədir.
"Azerspace" telekommunilkasiya peyki rəqəmli teleradio yayımı xidmətlərinin göstərilməsi, internet şəbəkəsinə çıxış, məlumatların ötürülməsi, VSAT multiservis şəbəkəsinin, eləcə də hökumət əlaqələrinin yaradılması üçün nəzərdə tutulub. "Azerspace" peyki C diapazonlu 24 transponderlə (tezlik zolağı 4-6 GHz) və Ku diapazonlu 12 transponderlə (tezlik zolağı 11-13 GHz) təchiz olunacaq.Peyk Malayziyanın peyk operatoru MEASAT şirkətindən icarəyə götürülən 46 dərəcə şərq uzunluğu orbital mövqeyində yerləşəcək. "Azerspace"in xidmət zonasına Avropa, Mərkəzi Asiya və Afrika ölkələri daxil olacaq. Peykin orbitdə istismar müddəti 20 ilə qədər təşkil edəcək.
Aprelin 19-na olan rəsmi 0,7918 AZN/USD təşkil edir.