Azərbaycan, Bakı, 19 may /Trend, müxbir H.Vəliyev/
Azərbaycanda 2011-2014-cü illər üçün əqli mülkiyyət sahəsində milli strategiyanın qəbul ediləcəyi gözlənilir. Bu barədə cümə axşamı Trend-ə Azərbaycanın Müəllif Hüquqları Agentliyindən məlumat verilib.
Azərbaycanın əqli mülkiyyətin müdafiəsi strategiyası Ümumdünya Əqli Mülkiyyət Təşkilatının və Avropa Komissiyasının mütəxəssisləri tərəfindən bəyənilib.
"Sənəd baxılmaq üçün Nazirlər Kabinetinə təqdim edilib. Hazırda texniki aspektlərin müzakirəsi aparılır və sənəd əlavə və dəyişikliklərdən sonra yaxın vaxtlarda qəbul ediləcək", - agentlikdən bildirilib.
Strategiyada əqli mülkiyyət sahələrinin problemləri öz əksini tapıb, saxta məhsulların istehsalı və satışı ilə mübarizə metodları və s. ora daxil edilib.
Ümumilikdə strategiya 30 məqsədli istiqaməti nəzərdə tutur ki, burada təxminən 90 konkret tədbir birləşdirilib.
Azərbaycan dünyada əqli mülkiyyət sahəsində uzunmüddətli milli strategiyanın qəbul ediləcəyi ilk ölkələrdən biri ola bilər. Bu istiqamətdə işlərin əlaqələndirilməsi məqsədilə artıq birgə komissiya yaradılıb və onun tərkibinə Azərbaycanın Müəllif Hüquqları Agentliyi və Standartlaşdırma, Metrologiya və Patent üzrə Dövlət Komitəsinin mütəxəssisləri daxil edilib.
