Azərbaycan, Bakı, 14 iyun /Trend, müxbir H.Vəliyev/
Azərbaycan Milli Elmlər Akademiyasının İnformasiya Texnologiyaları İnstitutu IBM şirkəti ilə "bulud hesablamaları" texnologiyasının təşəkkülü üçün proqram aparat həllərinin tədarükünə dair müqavilə bağlayıb. Bu barədə Trend-ə İTİ-nin baş mühəndisi Rəşid Ələkbərov deyib.
Ələkbərovun sözlərinə görə, texnikanın tədarükü noyabrın ortalarına gözlənilir, bundan sonra DATA-mərkəz cəlb ediləcək və Elmlər Akademiyasının əməkdaşlarına xidmətlər göstərməyə başlayacaq.
"DATA-mərkəzin məhsuldarlığı 1,5 teraflop, operativ yaddaşın həcmi 650 Qiqabayt, xarici massivin həcmi isə təxminən 40 terabayt təşkil edəcək. Massivin geniş həcmi Elmlər Akademiyasının institutlarının məlumat bazalarının arxivləşdirilməsini aparmağa imkan verəcək. Hazırda ikimərtəbəli binanın tikintisi üzrə işlər artıq başa çatdırılıb. Orada DATA-mərkəz yerləşəcək və yaxın vaxtlarda biz mərkəzin sərinlik sistemləri ilə təchiz edilməsinə başlayacağıq", - Ələkbərov qeyd edib.
Əvvəlcədən layihənin həyata keçirilməsi məqsədilə institut tərəfindən HP şirkətinin də təklifinə baxılıb.
Bundan əvvəl Ələkbərovun dediyinə görə, institutun IBM-in həllərini seçməsi bu vendorun texniki avadanlıqla yanaşı, proqram tərkibini də təqdim etmək imkanına malik olması ilə əlaqədardır.
"Bulud hesablamaları" texnologiyalarından ilkin olaraq Elmlər Akademiyasının 35 elmi-tədqiqat institutunun 35-dən çox əməkdaşı, gələcəkdə isə respublikanın bütün alimləri və ali məktəbləri istifadə edə biləcək. "Cloud computing" texnologiyasının resurslarından istifadə edən istifadəçilər mürəkkəb tapşırıqları tezliklə həll edə biləcəklər. Buna adi fərdi kompüterlərin resursları ilə nail olmaq mümkün deyil.
Son istifadəçilərə "bulud hesablamaları"nın xidmətlərindən uzaq məsafəli dinamik istifadənin təqdim edilməsi bilavasitə məlumatların ötürülmə sürəti 100 Mbit/saniyəni ötən "AzScienceNet" elmi kompüter şəbəkəsi vasitəsilə həyata keçiriləcək.
İstifadəçilər "Cloud computing" bazasında üç idarəetmə xidmətindən - SaaS (software -as -a -service), PaaS (Platform -as -a -service) və IaaS (Infrastructure -as -a -Service) - istifadə edə biləcəklər.