Azərbaycan, Bakı, 26 sentyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Bakı Telefon Rabitəsi" İstehsalat Birliyi Ələt qəsəbəsində CDMA standartlı simsiz rabitə şəbəkəsinin genişləndirilməsinə başlayıb. Trend-in məlumatına görə, bu barədə nazirliyin bazar ertəsi yaydığı məlumatda deyilir.
Hazırda operator qəsəbədə yeni CDMA baza stansiyasının quraşdırılması işlərini aparılır.
Bundan əvvəl İB-dən Trend-ə deyilib ki, operator ümumilikdə ilin sonunadək Bakı və paytaxt ətrafında, daha çox siqnalı aşağı səviyyədə qəbul edən ərazilərdə əlavə yeni 3 baza stansiyasının işə salınmasını planlaşdırır. Bu ərazilər operator tərəfindən keçirilən monitorinqlə təyin olunacaq.
Hazırda operator Mərdəkan qəsəbəsində yeni baza stansiyasının quraşdırılması işlərini tamamlayır. Stansiya yaxın günlərdə işə salınacaq.
Avadanlıqların tədarükçüsü gələcək nəsil rabitə şəbəkələrinin həlli sahəsində dünya lideri olan Çinin "HuaweiTechnologies" şirkətidir.
İB-nin CDMA şəbəkəsinin nömrə tutumu 20 min ədədə çatıb, bunun 8,5 min ədədi istismardadır.
Bu gün İB-nin CDMA şəbəkəsi Bakı və Abşeron yarımadasının ərazilərini əhatə edir. Bu standartdakı rabitə xidmətləri "511" indeksi ilə göstərilir. Regional səviyyədə bu xidməti İB-nin abunəçilərinə göstərmək üçün Aztelekom İB (Aztelekom şəbəkəsi respublikanın təxminən 30 rayonunu əhatə edir) ilə bağlanmış müqaviləyə əsasən, respublikadaxili rouminq tətbiq olunur.
Genişzolaqlı DSL-ə çıxışa alternativ olan CDMA kabel çəkilişinin əsaslandırılmayacaq qədər baha olduğu ucqar rayonlardakı əhalinin internetə çıxışını asanlaşdırmağa imkan verir.
