Azərbaycan, Bakı, 5 noyabr /Trend müxbir H.Vəliyev/
Azərbaycan Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin müdiri İsfəndiyar Əliyev Regional Rabitə Əməkdaşlığı Komissiyasının informasiyalaşdırma üzrə sədr müavini vəzifəsinə təyin edilib. Bu barədə şənbə günü Trend-ə nazirlikdən məlumat verilib.
Seçkilər RRƏ-nin normativ sənədlərinə uyğun olaraq Komissiyanın oktyabrın 27-də Moskvada keçirilən 26-ci iclası çərçivəsində baş tutub.
Komissiyanın iclasının iştirakçıları İKT sahəsində metodoloji və təşkilati-texniki təminat işlərini həyata keçirən baza təşkilatı haqqında layihənin vəziyyətinə aid təklifə, eləcə də RRƏ-iştirakçı ölkələrin iqtisadiyyatını modernləşdirmək məqsədilə elektron hökumətin texnologiyasından istifadəsi haqqında məsələyə baxıblar.
İclas çərçivəsində iştirakçılar tərəfindən RRƏ iştirakçısı olan ölkələrin əməkdaşlığı üzrə milli elektron kitabxanaların yaradılması, milli kitabxana fondlarının elektron varianta keçirilməsi təklifinə, internet şəbəkəsindən istifadə ilə elektron kitabxana fondlarının mübadiləsi üzrə və gündəmdəki digər məsələlərə baxılıb.
