Azərbaycan, Bakı, 31 yanvar / Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyinin "Bakı Telefon Rabitəsi" İstehsalat Birliyi CDMA simsiz rabitə xidmətinin əhatə zonasının genişləndirilməsi üçün daha bir baza stansiyasının quraşdırılması üzrə işləri başa çatdırıb. Bu barədə çərşənbə axşamı Trend-ə İB-dən məlumat verilib.
Yeni stansiya Azərbaycan Dövlət Gömrük Komitəsi yaxınlığında yerləşən "438" ATS ərazisində yerləşir.
Stansiyanın birinci rübdə istismara verilməsi planlaşdırılır ki, bu da operatora Ələt qəsəbəsi istiqamətində simsiz rabitənin genişləndirilməsinin növbəti mərhələsinin reallaşdırılmasına keçməyə imkan verəcək.
Bu gün İB şəbəkəsində CDMA simsiz rabitə xidmətinin göstərilməsi üçün 22 baza stansiyası fəaliyyət göstərir.
Operatorun planlarına daha iki əlavə stansiyanın quraşdırılması daxildir. Onlardan biri Qobustanda quraşdırılacaq və bu da Qaradağ rayonunun magistral yolunu simsiz rabitə ilə əhatə etməyə imkan verəcək.
Avadanlıqların tədarükçüsü Çinin Huawei Technologies şirkətidir.
"Bakı Telefon Rabitəsi" İstehsalat Birliyində CDMA-nın telefon tutumu 20 min ədədə çatır. Bunun 8,6 mindən çoxu istismardadır.