Azərbaycan, Bakı, 1 fevral /Trend, müxbir H.Vəliyev/
Azərbaycanda "Elektron məktəb" (e-Scholl) layihəsinə qoşulan məktəblərin ümumi sayı 32-yə çatıb. Bu barədə çərşənbə günü Trend-ə Təhsil Nazirliyi yanında Təhsil Sisteminin İnformasiyalaşdırılması İdarəsinin rəisi Samir Məmmədov deyib.
Məmmədovun sözlərinə görə, bu siyahı maliyyələşdirmənin artırılmasından asılı olaraq genişlənəcək.
"Bu gün əsas vəzifə hər bir sinifdə internetə çıxış imkanı olan ən azı bir kompüterin olmasıdır. Bu, müəllimlər tərəfindən "Elektron jurnal"ın doldurulması prosesini asanlaşdıracaq. "Elektron məktəb" layihəsinə qoşulan məktəblər bütün zəruri avadanlıqlarla təmin edilib", - Məmmədov qeyd edib.
"Elektron jurnal"ın köməyi ilə eyniləşdirilmiş məlumatlardan (parol və loqin) istifadə etməklə şagirdlərin dərsə gəlməsi və müvəfəqiyyəti haqqında məlumat almaq olar.
Bundan təhsil alanların valideynləri də istifadə edə bilərlər. Onlar bu məlumatı təhsil portalından (www.edu.az) əldə edə bilərlər. Bunun üçün məktəb tərəfindən verilən istifadəçi adı və parolundan istifadə etmək lazımdır.
"Hazırda SMS məlumatlandırma modulunun inteqrasiyası üzrə işlər başa çatdırılıb. Bu xidmət bilavasitə mobil rabitə operatorları tərəfindən təqdim edilir. Valideyn həmin operatorla birbaşa müqavilə bağlaya bilər", - Məmmədov vurğulayıb.
