Azərbaycan, Bakı, 15 mart /Trend, müxbir H.Vəliyev/
Azərbaycan Milli Elmlər Akademiyasının Respublika Seysmoloji Xidmət Mərkəzi (RSXM) Birləşmiş Ərəb Əmirliklərində telemetrik seysmik stansiyalar quraşdıracaq. Bu barədə cümə axşamı Trend-ə Mərkəzin baş direktorunun müavini Azay Rzayev bildirib.
Rzayevin sözlərinə görə, işlər seysmik avadanlıqların tədarükçüsü olan ABŞ-ın "Kinemetrics" şirkəti ilə əldə edilmiş razılaşma əsasında həyata keçiriləcək.
Artıq BƏƏ-də olan Mərkəzin mütəxəssisləri Əbu-Dabidə peyk texnologiyaları ilə çalışan telemetrik stansiyanın instalyasiyasında iştirak edəcək, eləcə də həmin sistemlərdən istifadə üzrə treninqlər keçirəcəklər.
Stansiyalar seysmik cəhətdən aktiv olan zonalarda monitorinq aparmağa imkan verəcək. Seysmik cəhətdən aktiv zonalarda quraşdırılan vibrasiyalı sensorların informasiyası peyklər vasitəsilə real vaxt rejimində baş mərkəzə daxil olacaq. Sistem məlumatların işlənməsindən sonra zəlzələnin dəqiq yeri, gücü və müddəti barədə məlumat əldə etməyə imkan verəcək.
