Azərbaycan, Bakı, 24 noyabr /Trend, müxbir H.Vəliyev/
EPEG (Europe Persia Express Gateway) optik-lif kabel magistralının tikintisi tam başa çatdırılıb. Bu barədə şənbə günü Trend-ə layihəyə yaxın mənbə deyib.
Bu yaxınlarda İranda keçirilən konsorsium iştirakçılarının yığıncağı çərçivəsində kabel magistralının sınaqdan keçirilməsinə başlamaq haqqında qərar qəbul edilib.
EPEG kabel magistralının yaradılması üzrə konsorsiuma İranın TIC (Telecommunication Infrastructure Company), Omanın "Omantel", Rusiyanın "Rostelekom" şirkətləri və C&W beynəlxalq şirkəti (Cable&Wireless) daxildir.
Oman və Frankfurtu birləşdirən EPEG kabel magistralı üç ölkənin (Azərbaycan, Polşa və Ukrayna) ərazisindən keçir. Bu marşrutlar 3 dövlətdən hər birində icarəyə götürülən qurğularda təşkil edilir.
EPEG kabel magistralının işə salınması bir neçə dəfə təxirə salınmışdı ki, bu da İran və Oman arasında çəkilməli olan kabel magistralının dəniz seqmentinin hazır olmaması ilə əlaqədar idi. Hazırda dəniz seqmentinin çəkilməsi üzrə işlər tam başa çatdırılıb.
"EPEG magistralının istismara verilməsi yaxın vaxtlarda gözlənilir", - mənbə qeyd edib.
EPEG-in Azərbaycan seqmenti sınaqdan keçirilmə mərhələsindədir. Azərbaycan seqmentinin tikintisi üzrə işlər çərçivəsində şəbəkə infrastrukturu, beynəlxalq birləşmələr infrastrukturu instalyasiya edilib və tranzit həcmi üçün şəbəkələrin birləşdirilməsi təmin edilib.
Kabel magistralının buraxılış qabiliyyəti 3,2 Tbit/s təşkil edəcək, uzunluğu isə 6 min kilometrə çatacaq. Layihənin ilkin olaraq təxminən 200 milyon dollar məbləğində qiymətləndirilir.
