Azərbaycan, Bakı, 28 noyabr /Trend, müxbir H.Vəliyev/
Azərbaycanın orta təhsil müəssisələrinin təqribən 40 faizi internet şəbəkəsi ilə əhatə olunub. Bu barədə çərşənbə günü Trend-ə Təhsil Nazirliyinin Təhsil Sisteminin İnformasiyalaşdırılması İdarəsindən bildiriblər.
İnternet şəbəkəsinə qoşulan məktəblərin sayı artırılacaq.
İdarənin məlumatına görə, Azərbaycanda məktəblərin kompüterləşdirilmə səviyyəsi 80 faizi ötür.
İlin sonuna kimi məktəblərə "1 şagird - 1 kompüter" layihəsi çərçivəsində 200 netbuk veriləcək. Layihə çərçivəsində "Elektron məktəb" layihəsinə qoşulmuş 15 ümumtəhsil müəssisəsi simsiz genişzolaqlı internetə çıxışa imkan verən iki mindən artıq netbuk və USB modem alıb.
Hazırda başlıca vəzifə müəllim heyətinin İT savadlılığının artırılmasıdır. Ümumtəhsil müəssisələrinin müəllimlərinin təxminən 70 faizi tədris prosesində informasiya texnologiyalarının tətbiqi üzrə treninqlərdə iştirak edib.
2012-ci ilin sonuna kimi inzibati-idarəetmə və pedaqoji heyətin 13 890 üzvü üçün İKT biliklərin artırılması üzrə təlimlər keçiriləcək. Regional orta ümumtəhsil müəssisələrinin texniki heyətindən isə iki min nəfərə məlumatın toplanması mərkəzindən istifadə üzrə təlimlər keçiriləcək.
