Azərbaycan, Bakı, 14 yanvar /Trend, müxbir H.Vəliyev/
Azərbaycan Milli Elmlər Akademiyasının Kibernetika İnstitutu Naxçıvan Muxtar Respublikasında (NMR) anomal seysmik proseslərin proqnozlaşdırılması üzrə monitorinq sisteminin üç stansiyasını quraşdırmağı planlaşdırır. Bu barədə bazar ertəsi Trend-ə institutun direktoru Telman Əliyev bildirib.
Əliyevin sözlərinə görə, stansiyaların Sədərək, Nehrəmdə və Böyük Düzdə quraşdırılması planlaşdırılır.
"Sədərəkdə yerləşdiriləcək stansiyanın layihəsi NMR Şəhərsalma Komitəsi tərəfindən hazırlanıb. Tikinti işlərinə yaxın vaxtlarda başlamaq planlaşdırılır. İki digər stansiyanın tikintisi ikinci mərhələ çərçivəsində həyata keçiriləcək", - Əliyev deyib.
İnstitutun perspektiv planlarına Azərbaycan ərazisində bir sıra stansiyaların tikintisi daxildir. İnstitut direktorunun sözlərinə görə, bu stansiyalar Balakən, Zaqatala, Ağstafa, Qazax, Quba, Xaçmaz, Astara və Lənkəranda yerləşəcək.
Bu, zəlzələlərin episentrlərini daha dəqiqliklə müəyyən etməyə icazə verəcək. Gözlənildiyi kimi, monitorinq sisteminin effektivliyi NMR-də yeni stansiyanın yaradılacağından sonra artacaq.
Hazırda Azərbaycanda anomal seysmik prosesləri aşkar etməyə, həmçinin onların monitorinqini keçirməyə imkan verən beş stansiya fəaliyyət göstərir. Stansiyalar Qum adası, Neftçala, Naftalan, Şirvan və Siyəzəndə yerləşir.
Bu gün fəaliyyət göstərən stansiyalar anomal seysmik prosesləri Yer səthində təzahür etməsinə 15-20 saat qalmış qeyd etməyə qadirdir.