Azərbaycan, Bakı, 19 sentyabr /Trend, müxbir Hüseyn Vəliyev/
"Azercell Telecom" Azərbaycanın digər mobil operatorlarının mobil rabitə xidmətləri göstərmək məqsədilə şirkətin baza stansiyalarından istifadə etməsinə şərait yaradıb. Bunu cümə günü Trend-ə "Azercell Telecom" şirkətinin prezidenti Kiril Qaburiç deyib.
Onun sözlərinə görə, şirkət Azərbaycanda baza stansiyalarının ən geniş şəbəkəsinə malikdir: "Daxili rouminq" çərçivəsində şəbəkənin üstünlüklərindən yeni operator "Naxtel" və ölkənin mobil rabitə bazarının digər iştirakçıları istifadə edə bilərlər".
K.Qaburiç qeyd edib: "Biz rəqiblərimizlə baza stansiyalarımızın resursları ilə mübadilə aparmağa başlamışıq. Güman edirəm ki, baza stansiyalarının resurslarından qarşılıqlı istifadə mobil rabitə operatorları üçün çox səmərəli olacaq, çünki respublika ərazisində fəaliyyət göstərən stansiyaların yaxınlığında şirkətin öz stansiyalarını quraşdırması üçün əlavə xərclərə zərurət yaranmır".
