Azərbaycan Rabitə Sahəsində Regional Əməkdaşlıq Təşkilatının növbəti iclasında iştirak edəcək. Rabitə və İnformasiya Texnologiyaları Nazirliyindən Trend ə verilən məlumata görə, tədbir sentyabrın 5-dən 10-na kimi Daşkənddə keçiriləcək.
İclasda Azərbaycan nümayəndə heyətini Nazirliyin poçt şöbəsinin müdiri Novruz Məmmədov və Azərpoçt DM-in İnformasiya Texnologiyaları şöbəsinin mühəndisi İsmayıl İbrahimov təmsil edəcək. Onlar tədbir iştirakçılarına Azərbaycanda poçt sahəsində əldə olunmuş son nailiyyətlər, o cümlədən, Dünya bankının ölkənin poçt xidmətlərinin inkişafına yönəldilmiş üç illik layihəsi barədə məlumat verəcəklər.
Nazirlikdə, həmçinin onu da bildiriblər ki, tədbir çərçivəsində RRƏT-yə üzv ölkələrin poçt komissiyalarının XX və RRƏT Poçt Operatorları Şurasının X iclası keçiriləcək.
Bundan başqa, iclaslar çərçivəsində poçt sahəsində yeni informasiya texnologiyalarının tətbiqi mövzusuna həsr olunmuş beynəlxalq seminarın keçirilməsi planlaşdırılır. Bu seminarda MDB ölkələri poçt idarələrinin nümayəndələrinin iştirakı gözlənilir.