Azərpocht Dövlət Müəssisəsi (DM) Azərbaycanın regionlarında bir sıra obyektləri istismara vermək niyyətindədir. DM-dən Trend ə verilən məlumata görə, obyektlərin açılışı mayın birinci ongünlüyündə baş tutacaq.
Dövlət strukturundan bildirilib ki, bunlar tikintisinə 2005-ci ildə başlanılan 3 poçtun inzibati binalarıdır. Binalar Xızı, Ağstafa və Mingəçevirdə yerləşir. Hazırda Fizuli rayonunun Balabəhmənli kəndində rabitə evinin tikintisi aparılır.
"Bu gün bütün obyektlərdə bəzək işləri, onların yerləşdikləri ərazidə isə abadlıq işləri aparılır", - DM-dən bildirilib.
Açılış mərasimində müəssisənin rəhbər şəxslərinin, bu rayonlarının icra hakimiyyətlərinin iştirakı planlaşdırılır.
Ümumilikdə, 2006-cı ildə bütün ölkədə 240 poçt şöbəsinin tikintisi nəzərdə tutulub.
Bundan əlavə, Bakı və ətraf qəsəbələrin inkişafı proqqramına uyğun olaraq Azərpocht 20-dən artıq poçt şöbəsində tikinti-quraşdırma işləri aparır.
