Azərbaycanın Rabitə və İnformasiya Texnologiyaları Nazirliyi yüksək texnologiyaların inkişafının xüsusi iqtisadi zonasının yaradılması üzrə konsaltinq xidmətlərinin göstərilməsi üçün beynəlxalq ekspertlərin cəlb olunma ehtimalını gözdən keçirir.
Nazirlikdən Trend ə verilən xəbərə görə, hazırda konsaltinqin keçirilməsinin iki variantı var. Birincisi - öz tender təkliflərini təqdim etmiş şirkətlərdən - Ernst & Young və Salans alyansı və Amerikanın Angel şirkəti arasından birini seçməkdən ibarətdir. Digər variant - beynəxalq ekspertlər qrupunun yaradılmasıdır. Əgər ikinci variant daha məqsədəuyğun hesab olunsa, o zaman işçi qrupun işində əvvəllər tender təklifləri vermiş konsaltinq şirkətləri iştirak edə bilər. Qrup yaradılarsa, ora yerli ekspertlər və Rabitə Nazirliyinin mütəxəssisləri də daxil olacaq.
"Hazırda texnoparkların olduğu ölkələrdə ABŞ, Avropa, Asiya ekspertləri ilə danışıqlar aparılır. Azərbaycanın da Rabitə Nazirliyinin simasında üzv olduğu Beynəlxalq elmi parklar assosiasiyası həmçinin öz ekspertlərini göndərməyə hazır olduğunu bildirib", - deyə dövlət qurumundan bildirilib.
Nazirlikdə hesab edirlər ki, avqustun sonuna qədər həmin vəziyyəti müəyyənləşdirmək mümkün olacaq.
Azərbaycanda yüksək texnologiyalar sektorunun vəziyyətinin təhlil edilməsi və yüksək texnologiyalar üçün xüsusi zonaların yaradılmasının məqsədəuyğunluğunun müəyyənləşdirilməsi, belə strukturun yaradılmasının müsbət və mənfi tərəflərinin, onun sektorun və ümumilikdə ölkə iqtisadiyyatının inkişafına təsirinin öyrənilməsi, hüquqi bazanın yaradılması nəzərdə tutulub. İşlər 4 ay ərzində yerinə yetirilməlidir.