Azərbaycan, Bakı /müx. Trend S.Babayeva/ Cümə axşamı Azərbaycanın rabitə və informasiya texnologiyaları naziri Əli Abbasov İsveçin səfiri Hans Hunnar ilə görüşdə bildirib ki, Azərbaycan və İsveç rabitə və informasiya texnologiyaları sahəsində əməkdaşlıq barədə hökumətlərarası müqavilə imzalayacaqlar.
Onun sözlərinə görə, müqavilənin layihəsi hazırlanıb və razılaşdırılma məqsədilə İsveç tərəfinə təqdim olunub.
Nazir səfirə bildirib ki, o, İsveçin Rabitə Nazirliyinin rəhbərini noyabrın 21-24-də Bakıda keçiriləcək 13-cü "Telekommunikasiya və İnformasiya Texnologiyaları" beynəlxalq sərgi və konfransında iştirak etmək məqsədilə Azərbaycana dəvət etmək niyyətindədir.
Səfir və nazir arasında keçirilən görüşün müzakirə mövzusuna həmçinin Azərbaycanda regional innovasiya zonasının yaradılması layihəsində İsveçin "Ericsson" şirkətinin iştirakı və Azərbaycanın Rabitə Nazirliyi və Heteborqda yerləşən Çalmers Texnologiya İnstitutu arasında yaradılan əlaqələr daxil olub.