İsrail, Qüds, 13 oktyabr/ Trend , müxbir A.Qut/Dörd gün ərzində Akkoda baş verən millətlərarası toqquşmalarda 54 nəfər həbs edilib. Bunların yarısı əraəb, yarısı isə yəhudidir. Oktyabrın 12 -də həbs edilənlərin çoxu Hayfa ətrafındakı sülh məhkəməsinə gətirilib və onların həbs müddətinin uzadılması məsələsi müzakirə edilib.
Həbs olunanlar arasında iki yeniyetmə
də var. Onlar istintaq təcridxanasından
çıxarılaraq, ev dustağı ediliblər. Oktyabrın
12 - də polis həbs edilənlərin bəzilərinə qarşı
ittihamların irəli sürülməsi ilə bağlı
məhkəməyə müraciət etmək
qərarını dərc etdirib. Onlara qarşı ictimai qayda
- qanunun kütləvi pozulması, yanğınların
törədilməsi, bədənə xəsarət
yetirilməsi ilə bağlı ittihamlar irəli
sürülüb.
Xatırladaq ki, Akko şəhərində (orada 10 mindən
çox Azərbaycan əsilli əhali yaşayır)
iğtişaşlar Qiyamət gününün orucluğu başlayandan
sonra bir nəfər ərəbin maşınında radioya
yüksək səs verərək, əhalinin sıx yaşadığı
məhəlləyə girməsindən sonra baş verib. O, gecə
vaxtı küçədə velosiped sürən
uşaqların həyatına təhlükə
törədərək, qəfil dönüşlər edib
və şütüyüb. Yəhudilər bunu təxribat
kimi qəbul ediblər. Şahidlərin dediklərinə
görə, bir qrup gənc maşını daşlayıb,
lakin ərəbin köməyinə yəhudiləri basıb keçmək
istəyən bir neçə maşın və daha sonra avtobusla,
dəyənək və balta ilə silahlanmış şəxslər
gəlib. Toqquşmada bir neçə nəfər
yaralanıb, yüzlərlə maşın və mağaza
talan edilib.
Maraqlıdır ki, Akko şəhərində
iğtişaşın səbəbkarı - ərəb Taufiq
Camal bazar ertəsi Knessetin beynəlxalq və müdafiə
məsələləri üzrə komissiyasının
qarşısına çıxıb və səhv etdiyini
etiraf edib. O qeyd edib ki, ittihamda göstərildiyi kimi,
sərxoş olmayıb və musiqiyə yüksək səs
verməyib və üsr istəməyə hazırdır.
"Mən ağır sınaqlardan keçmişəm, məni
qatil və faşist adlandırırlar. Mən üzr
istəməyə hazıram və yeganə istədiyim
şey - evə qayıtmaqdır", - Ynet
informasiya agentliyi Camalın sözlərindən sitat
gətirib. Camal parlament komissiyasının üzvlərinə
dinc yanaşı yaşama Forumunun
təsisçilərindən biri olduğunu da bildirib.
İsrail hökuməti oktyabrın 12 -də keçirilmiş iclasında son günlər Akkoda baş vermiş hadisələrə xeyli vaxt ayırıb. Hökumət rəhbəri Olmert bəyan edib ki, bu hadisələr narahatlıq doğurur. "Akko həmişə yəhudi və ərəblərin birgə yaşaması üçün ideal nümunə olub və bu şəhərin gələcək inkişafına və çiçəklənməsinə stimul verib. Akkonun sakinləri zorakılıq, fanatizm və şovinizmlə bəslənmiş ekstremist qrupların qurbanı olub", - İsrailin Baş naziri qeyd edib.
İsrailin prezidenti Şimon Peres Akko şəhərinin yerli liderlərinə zorakılığı dayandırmaq xahişi ilə müraciət edib. "Mən Akkonun bütün sakinlərinə iğtişaşlara, zorakılığa və özbaşnalığa təcili son qoymaq xahişi ilə müraciət edirəm", - o deyib.
Qeyd etmək lazımdır ki, İsrail dövlətinin dəftərxanasından Trend -a verilən məlumata görə, Peres bazar ertəsi Akkoya hər iki tərəfi - yəhudi və ərəb tərəfini barışığa inandırmaq üçün gəlməlidir. Yeri gəlmişkən, Prezident Dəftərxanasının nümayəndələri bir neçə gündür ki, yerli icmaların rəhbərləri ilə fəal danışıqlar aparırlar.