İran, Tehran, 12 yanvar /" Trend ", müxbir A. Namdari/ İran parlamentinin Milli Təhlükəsizlik Komissiyasının üzvü bildirib ki, iranlı deputatlar İsrailin Qəzzəyə hücumlarının dayandırılması məqsədilə nümayəndə heyətləri çərçivəsində bir sıra dünya ölkələrinə səfərlər edəcəklər.
Vəramin regionundan olan deputat Hüseyn Təqəvi bazar ertəsi Trend -a müsahibəsində qeyd edib ki, bu səfərlər Milli Təhlükəsizlik Komissiyası və Parlamentlərarası Dostluq Qrupu rəhbərlərinin təşəbbüsü ilə həyata keçirilir.
Təqəvi həmçinin bildirib ki, İran İslam Şurası Məclisinin sədri Əli Laricani həmin diplomatik fəaliyyətlərin davamı olaraq sabah Türkiyə Respublikasına səfər edərək, Qəzzədəki böhranla bağlı Türkiyə rəhbərliyi ilə danışıqlar aparacaq.
Laricani daha öncə bu məsələ ilə əlaqədar Suriyaya səfər etmişdi, Misirə nəzərdə tutulan səfəri isə naməlum səbəblərdən təxirə salınmışdı.
Parlament üzvü həmçinin qeyd edib ki, ilk parlament nümayəndə heyəti yaxın günlərdə Türkiyəyə yola düşəcək. Deputat sözügedən nümayəndə heyətinin tərkibi barədə məlumat verməyib.
Təqəvi eyni zamanda deyib ki, İran diplomatiyası, İsrailin Qəzzəyə hücumlarının ən qısa zamanda dayandırılmasına çalışacaq. O, həmçinin həmin diplomatik səylərin səmərəli olacağına ümidvar olduğunu bildirib.
İsrailin Qəzzə zolağına hücumları üç həftədir ki, davam edir.
Bir çox ölkələr və beynəlxalq təşkilatlar bu hücumların dayandırılmasını tələb edirlər.
İsrail hərbi hücumların dayandırılması çağırışlarını rədd edib.