Bakı. Trend:
Çin Afrikaya 51 milyard dollar məbləğində yeni maliyyə dəstəyi təklif edir və 1 milyon iş yeri yaratmağı planlaşdırır.
Trend-in CNBC Africa-ya istinadən verdiyi məlumata görə, Prezident Si Tsinpin bildirib ki, Çin Afrikaya dəstəyini artırmaqla, infrastruktur layihələrini genişləndirəcək və ən azı 1 milyon iş yeri yaradacaq. Çin Afrikaya təxminən 51 milyard dollar məbləğində maliyyə yardımı ayıracaq.
Dünyanın ən böyük ikitərəfli kreditoru olan Çin, bahalı infrastruktur layihələrindən uzaqlaşaraq, inkişaf etməkdə olan ölkələrə qabaqcıl və təmiz texnologiyaların satışına yönəlmək niyyətindədir. Bununla belə, Si Tsinpin Afrikada 30 infrastruktur layihəsinin həyata keçirildiyini və 360 milyard yuan (50,7 milyard dollar) maliyyə dəstəyinin təklif ediləcəyini vurğulayıb.
Pekində keçirilən Çin-Afrika sammitində Si Tsinpin deyib: “Çin, Afrika ilə sənaye, kənd təsərrüfatı, infrastruktur, ticarət və investisiya sahələrində əməkdaşlığı dərinləşdirməyə hazırdır.”
Prezident həmçinin COVID-19 məhdudiyyətlərinin aradan qaldırılmasından sonra Çin podratçılarının Afrikada yenidən fəaliyyətə başladığını və “Çin-Afrika nəqliyyat və inkişaf şəbəkəsinin” qurulmasının vacibliyini qeyd edib.
Keçən il Çin Afrikaya 4,61 milyard dollar kredit təsdiqləyib ki, bu da 2016-cı ildən sonra ilk illik artımdır.
Si Tsinpin əlavə edib ki, maliyyələşdirmə paketinin 210 milyard yuanı kredit xətləri, 70 milyard yuanı isə Çin şirkətlərindən gələn yeni investisiyalar vasitəsilə təmin ediləcək. Bununla yanaşı, hərbi yardım və digər layihələr də daxil olmaqla əlavə kiçik məbləğlər ayrılacaq.
Çin lideri həmçinin, Afrikada enerji çatışmazlığını aradan qaldırmaq məqsədilə 30 təmiz enerji layihəsinin həyata keçiriləcəyini bildirib. O, nüvə texnologiyasında əməkdaşlıq və sənayeləşməyə dəstək təklif edib.
Lakin Si Tsinpin 2021-ci ildə Dakar forumunda verdiyi 300 milyard dollarlıq Afrika mallarının alınması vədini bu dəfə təsdiqləməyib. Bunun əvəzinə, bazara çıxış imkanlarının genişləndirilməsi vədini verib. Təhlilçilər isə bildirirlər ki, Çinin fitosanitar qaydaları bu vədin yerinə yetirilməsini çətinləşdirir.
Si Tsinpin həmçinin Afrikada regional inkişafı dəstəkləmək məqsədilə logistika və maliyyə əməkdaşlığını dərinləşdirməyə hazır olduğunu vurğulayıb.