Bakı. Trend:
Haitidə yanacaq daşıyan yük avtomobilinin partlaması nəticəsində 24 nəfər həyatını itirib.
Trend-in “Reuters”ə istinadən verdiyi məlumata görə, hadisə Nippes departamentinin Miraqoane şəhəri yaxınlığında baş verib. Yük maşınının çəni başqa bir nəqliyyat vasitəsi tərəfindən deşildikdən sonra ətrafdakı insanlar yanacaq toplamaq üçün həmin əraziyə toplaşıblar və nəticədə böyük bir partlayış baş verib.
Partlayış nəticəsində 40 nəfər xəsarət alıb, onların yarısına üçüncü dərəcəli termik yanıq diaqnozu qoyulub. Haiti xilasetmə xidmətinin məlumatına görə, ölənlər arasında üç qadın və bir uşaq da var.
Haitinin Baş naziri Harri Konil hadisə yerinə gedərək, ağır yanıq xəsarətləri alan bəzi şəxslərin xüsusi yardım almaq məqsədilə helikopterlə təxliyə edildiyini bildirib. Hadisənin səbəbləri ilə bağlı araşdırmalar davam edir və xilasetmə əməliyyatları intensiv şəkildə aparılır.