Bakı. Trend:
Norveçin İqtisadi və Ekoloji Cinayətlər üzrə İdarəsi (“Ekokrim”) Norveçin keçmiş baş naziri (1996–1997-ci illər) və Avropa Şurasının baş katibi (2009–2019-cu illər) olmuş Torbyorn Yaqland barəsində korrupsiya şübhəsi ilə istintaqa başlayıb.
Trend bu barədə xarici KİV-ə istinadən xəbər verir.
Qurumun mətbuata açıqlamasında bildirildiyinə görə, araşdırma amerikalı maliyyəçi Ceffri Epşteynin işi üzrə sənədlərin dərcindən sonra başlanıb.
Norveç KİV-lərində yayılan məlumata görə, Yaqland Epşteynlə mütəmadi ünsiyyətdə olub. Xüsusən 2014-cü ildə ailəsi ilə birlikdə maliyyəçinin şəxsi adasına səfər etməyi planlaşdırsa da, səfər sonradan ləğv edilib.
Həmin ildə o, şəxsi yaşayış yerinin alınmasının maliyyələşdirilməsi üçün Epşteyndən kömək istəyib.