Bakı. Trend:
İran İslam İnqilabı Keşikçilər Korpusu (SEPAH) ABŞ-nin Səudiyyə Ərəbistanındakı şirkətlərinə raket və kamikadze dronları ilə hücumlar edib.
Trend-in məlumatına görə, bununla əlaqədar İran İslam İnqilabı Keşikçilər Korpusu (SEPAH) məlumat yayıb.
Məlumata görə, “Doğru Vəd 4” əməliyyatının 99-cu mərhələsində SEPAH orta mənzilli raketlər, Kruz raketləri və kamikazde dronlarından istifadə edərək ABŞ-nin Səudiyyə Ərəbistanındakı “Sadara”, “Exxon Mobile” və “Dow Chemical” və “Chevron Phillips” şirkətlərinə hücumlar təşkil edib.
SEPAH bildirir ki, BƏƏ limanında İsrailə məxsus konteyner daşıyan gəmiyə raket hücumu həyata keçirilib.
Qeyd olunur ki, ABŞ-yə məxsus “CVN 72” təyyarədaşıyan gəmi uzaqmənzilli “Kruz” raketləri ilə atəşə tutulub.
Qeyd edək ki, fevralın 28-də ABŞ və İsrail İrana qarşı hərbi əməliyyatlara başlayıb. Zərbələr ölkənin ən böyük şəhərlərinə, o cümlədən Tehrana endirilib. Ağ Ev hücumu İslam Respublikasından qaynaqlanan raket və nüvə təhdidləri ilə əsaslandırıb. İrana endirilən zərbələr nəticəsində ölkənin ali rəhbəri ayətullah Əli Xamenei və rəhbərliyin bəzi digər əsas fiqurları həlak olub. İranın İnqilab Keşikçiləri Korpusu İsrailə qarşı genişmiqyaslı cavab əməliyyatı həyata keçirdiyini bəyan edib. İran eyni zamanda ballistik raketlər, qanadlı raketlər və pilotsuz uçuş aparatları ilə ABŞ-nin Bəhreyn, İordaniya, İraq, Qətər, Küveyt, BƏƏ, Oman, Səudiyyə Ərəbistanı və Suriyadakı obyektlərini hədəfə alır.
Münaqişə nəticəsində regionun enerji infrastrukturu və dəniz nəqliyyatı da ciddi risk altına düşüb. Hörmüz boğazı ətrafında təhlükəsizlik gərginliyi səbəbindən dünya bazarında neft qiymətləri kəskin artıb. İran Hörmüz boğazına nəzarəti tam şəkildə özündə saxlayaraq sadəcə lazım bildiyi gəmilərin boğazdan keçməsinə icazə verir.