Bakı. Trend:
Bakı Zooloji Parkının loqo dizaynı ilə bağlı müsabiqə başa çatıb.
Qurumdan Trend-ə verilən məlumata görə, münsiflər heyətinin qiymətləndirilməsi əsasında ən yaxşı dizaynın müəllifi − Aydın Əsgərli müəyyən olunub.
Qalib loqo dizaynında Bakının tarixi abidəsi olan Qız qalasının fonunda əks olunan ölkəmizin “böyük Qafqaz beşliyi” – nəsli kəsilmək təhlükəsi ilə üzləşən beş heyvan növü təsvir olunub.
Müsabiqənin qalibi pul mükafatı və Zooloji Parkın xatirə hədiyyələri ilə təltif edilib.
Loqo dizaynı müsabiqəsi Bakı Zooloji Parkının 2018-ci ildə qeyd olunacaq 90 illik yubileyi ərəfəsində yenidənqurma və bərpa işlərinin aparılması çərçivəsində elan edilib. Təmir-quruculuq tədbirləri çərçivəsində Zooloji Parkın ərazisinin genişləndirilməsi, heyvanların saxlanma şəraitinin yaxşılaşdırılması və qəfəslərin beynəlxalq standartlara uyğunlaşdırılması, ərazidə müxtəlif təyinatlı əyləncə obyektlərinin istismara verilməsi və s. nəzərdə tutulur.