Beynəlxalq Muğam Mərkəzində klassik musiqi konserti keçirilib (FOTO)

Bakı. Trend:

Beynəlxalq Muğam Mərkəzində “Klassik musiqi inciləri” layihəsi çərçivəsində konsert keçirilib.

Trend-in məlumatına görə, mərkəzin səhnəsində layihə çərçivəsində ötən konsertdə rusiyalı skripkaçı Elina Drux möhtəşəm konsertlə çıxış etmişdi.

Konsertmeystr Arzu Səfərovanın müşayiəti ilə respublika və beynəlxalq müsabiqələr laureatı, prezident təqaüdçüləri Aytən İbrahimova, Zərrin Əliyeva, əməkdar artistlər Təranə Əliyeva, Ələkbər Ələkbərov, ifaçılar Aytən İbrahimova, Rövşən Qurbanov, Mehri Əsədullayeva, Fərid Quliyev çıxış ediblər.

Konsertdə Niyazinin, S.Rüstəmovun, T. Bakıxanovun, A.Rzayevin, S.Əliyevanın, H. Rzayevin, V.Adıgözəlovun, N.Əliverdibəyovun əsərləri səslənib.

Beynəlxalq Muğam Mərkəzi bir sıra layihələr həyata keçirir ki, bunlardan da "Aşıq musiqisi axşamları","Sirlər xəzinəsi", "Unudulmayanlar", “Yeni nəsil dəvət edir”, “Dastanlar”, “Muğamat var olan yerdə”, “Muğam axşamları”, “Vətənimdir Azərbaycan” adlı layihələri xüsusi ilə qeyd etmək lazımdır.

Qeyd edək ki, iyun ayında Bakı Summer Jazz day`s festivalına start verilir.

Beynəlxalq Muğam Mərkəzinin səhnəsində iyun ayının 4,5,7,8-də Bakı Summer Jazz day`s festivalı çərçivəsində möhtəşəm konsertlər keçiriləcək.

İyunun 4-də saat 20:30-da Beynəlxalq Muğam Mərkəzində caz dünyasında tanınmış truba ifaçılarından biri Avishai Cohen öz kvarteti ilə birlikdə çıxış edəcək.

İyunun 5-də saat 21:30-da Beynəlxalq Muğam Mərkəzində Azərbaycan pianoçusu Elçin Şirinov və Andras Des triosu birgə çıxış edəcəklər.

İyunun 7-də saat 20:30-da Beynəlxalq Muğam Mərkəzində “Lenny Kravitz yupkada” kimi tanınan Amerikalı funk bass gitaraçı və müğənni Nikn West öz ansamblı ilə birlikdə çıxış edəcək.

İyunun 8- də saat 20:30-da Fransanın tanınmış musiqiçiləri Jacky Terrasson (piano) və Stephane Belmondo (Trumpet) dueti yeni TERRAMONDO (Mother) layihəsi ilə çıxış edəcəklər.

Biletləri şəhərimizin kasslarından, “ASAN xidmət” mərkəzlərindən və İticket. Az saytından əldə etmək olar.