Azərbaycan, Bakı, 29 noyabr / Trend , müxbir S.Kazımlı/ Bakının Yasamal rayonu ərazisində qəzet redaktorunu ölümlə hədələyiblər. Mübahisənin şəxsi münasibətlər zəminində baş verməsi bildirilir. Bu barədə Yasamal rayon Polis İdarəsininin (RPİ) 29-cı polis bölməsindən şənbə günü Trend -a məlumat verilib.
Polis bölməsindən bildiriblər ki, Xırdalan sakini Fikrət Tanrıverdiyev polisə müraciət edərək deyib ki, noyabrın 27-də saat 20:00 radələrində rayonun Alatava qəsəbə sakini Yaşar Cavadov ona küçə söyüşləri söyərək təhqir edib və onu öldürəcəyi ilə hədələyib. Bundan başqa Cavadovun Tanrıverdiyevin "Mercedes" markalı avtomobilini müəyyən yerlərini əzib. Hadisəyə səbəb kimi Tanrıverdiyevin idarə etdiyi avtomobilin Cavadovun yaşadığı ünvanın qarşısında saxlaması olub. Bu səbəbdən də Cavadov avtomobili evinin qarşısında saxladığı üçün Tanrıverdiyevlə mübahisə edib. Tanrıverdiyevin "Gün" qəzetinin redaktoru olduğu qeyd edilir.
Polis bölməsindən əlavə ediblər ki, hələlik hadisə ilə bağlı Cavadov dindirilməyib. Hadisənin ətraflı araşdırılması üçün Cavadov dindiriləcək.
Faktla bağlı Yasamal RPİ-nin 29-cu polis bölməsində təhqiqat aparılır.
Məqalə müəllifi ilə əlaqə ünvanı:[email protected]