Azərbaycan, Lənkəran, 27 avqust / Trend , muxbir P.Əliyeva/
Azərbaycanın cənubunda yerləşən Lənkəranda Ədliyyə Nazirliyinin leytenantı yol-nəqliyyat hadisəsi nəticəsində ağır xəsarət alıb.
Lənkəran xətt polis məntəqəsindən cümə axşamı Trend -a verilən məlumata görə, bu gün səhər saat 06:30 radələrində Lənkəran-Liman yolunun 144-cü km-nin 10-cu buketində ağır yol-nəqliyyat hadisəsi baş verib.
Astaranın Kijəbə kənd sakini 1988-ci il təvəllüdlü Şiriyev Fuad Şahin oğlu idarə etdiyi "Nexia DAEWOO" markalı10 KE122 dövlət nömrə nişanlı avtomobillə Bakıdan Lənkəran istiqamətində hərəkətdə olarkən keçiddə dəmir yolunun qoruyucu relsinə çırpılıb. Nəticədə avtomobildə olan sürücünün qardaşı 1978-ci il təvəllüdlü Bakı şəhər sakini, Ədliyyə Nazirliyinin tibbi xidmət leytenantı Şiriyev Zaur Şahin oğlu ağır bədən xəsarətləri ilə Lənkəran Rayon Mərkəzi Xəstəxanasının travmatologiya şöbəsinə yerləşdirilib.
Xəstəxanadan verilən məlumata görə, gicgah nahiyyəsində əzilmiş, deşilmiş yara, kəllə-beyin travması diaqnozu ilə daxil olan yaralının vəziyyəti qənaətbəxşdir. Hadisəyə səbəb kimi avtomobilin yüksək sürətlə idarə olunması göstərilir.
Faktla bağlı Şirvan xətt polis məntəqəsində araşdırma aparılır.
Məqalə muəllifi ilə əlaqə unvanı:[email protected]
