Qəbələ rayon polis şöbəsinin məlumatı əlavə olunub. İlk xəbər saat 09:57-də yayılıb.
Azərbaycan, Bakı, 5 aprel / Trend müxbir K.Zərbalıyeva/
Azərbaycanın Qəbələ rayonunda qar uçqununa düşmüş 3 nəfərin axtarışı davam etdirilir.
Qəbələ rayon polis şöbəsindən Trend-ə verilən məlumata görə, Vəndam kənd sakinləri 1992-ci il təvəllüdlü Elvin Kərimov, 1990-cı il təvəllüdlü Nazir Bayramov və 1991-ci il təvəllüdlü Zakir Məmmədov ov etmək məqsədilə dağa gedib və geri qayıtmayıb.
Faktla bağlı rayon polis şöbəsində araşdırmalara başlanılıb.
Trend-in Fövqəladə Hallar Nazirliyinin rəsmi saytına istinadən verdiyi məlumata görə, nazirliyin "112" qaynar telefon xəttinə daxil olmuş məlumata əsasən, Qəbələ rayonu Vəndam kəndinin 3 sakini ov etmək məqsədilə dağa gedib və geri qayıtmayıb.
Yaxınları onların qar uçqununa düşdüyünü bildiriblər.
Dərhal Fövqəladə Hallar Nazirliyinin aviasia dəstəsinin 1 helikopteri, Xüsusi Riskli Xilasetmə Xidmətinin xilasediciləri və xüsusi təlim keçmiş itlər hadisə rayonuna cəlb olunublar.