Azərbaycan, Bakı, 12 iyul /Trend müxbir K.Zərbalıyeva/
Baş Dövlət Yol Polisi İdarəsi Astara və Tovuzda baş vermiş ağır yol qəzaları ilə bağlı rəsmi məlumat yayıb.
İdarədən Trend-ə verilən məlumata görə, iyulun 10-da saat 09:30 radələrində Astara rayonunun Maşxan kəndində, 1988-ci il təvəllüdlü Astara rayon sakini Əmirov Vüqar Məhərrəm oğlunun idarə etdiyi "VAZ-2106" markalı, 10-HB-019 dövlət qeydiyyat nişanlı avtomobillə 1987-ci il təvəllüdlü Astara rayon sakini Rustəmov Elçin Ədalət oğlunun idarə etdiyi "Volkswagen" markalı, 90-AG-472 dövlət qeydiyyat nişanlı avtomobil toqquşub.
Qəza nəticəsində "VAZ-2106 " markalı avtomobilin sürücüsü Əmirov və həmin avtomobildə olan sərnişin, Astara rayon sakini 2012-ci il təvəllüdlü Hidayətov Ruhan Səməd oğlu hadisə yerində ölüblər.
"Volkswagen" markalı avtomobilin sürücüsü Rustəmov və "VAZ-2106" markalı avtomobilin sərnişinləri, Astara rayon sakinləri, 1985-ci il təvəllüdlü Hidayətova Rufanə İsrafil qızı, 1974-cü il təvəllüdlü Hidayətova Mətanət Oktay qızı, 1957-ci il təvəllüdlü Hidayətova Məsmə İsmayıl qızı, 1974-cü il təvəllüdlü Hidayətov Mehman Ağasən oğlu müxtəlif dərəcəli bədən xəsarətləri alaraq xəstəxanaya çatdırılıblar.
Həmin gün saat 23:30 radələrində Tovuz rayonu ərazisində 1976-cı il təvəllüdlü Ağstafa rayon sakini Manafov Vüqar İsmayıl oğlunun idarə etdiyi "Mercedes" markalı, 05-BE-535 dövlət qeydiyyat nişanlı avtomobillə 1985-ci il təvəllüdlü Tərtər rayon sakini Vasif İsrafilovun idarə etdiyi "VAZ-2107" markalı, 60-BS-007 dövlət qeydiyyat nişanlı avtomobil toqquşub.
Qəza nəticəsində "VAZ-2107" markalı avtomobilin sürücüsü İsrafilov və həmin avtomobildə olan sərnişin, 1957-ci il təvəllüdlü Tovuz rayon sakini Quliyeva Gülyaz Tapdıq qızı hadisə yarində olüb.
Həmin avtomobildə olan digər sərnişinlər, İsrafilovun qızları - 2008-ci il təvəllüdlü Gunel, 2006-cı il təvəllüdlü Aytac, 1977-ci il təvəllüdlü Məmmədova Ülviyyə, 1987-ci il təvəllüdlü Gədəbəy rayon sakini İspəndiyarova Mətanət xəsarət alaraq xəstəxanaya çatdırılıblar.
Faktlarla bağlı araşdırmalar aparılır.