Azərbaycan, Bakı, 1 oktyabr /Trend, müxbir K.Zərbalıyeva, E.Mehdiyev/
Bakıda hündürmərtəbəli bina yanır.
Hadisə yerində olan şahidlərin Trend-ə verdiyi məlumata görə, Nəsimi rayonu ərazisində, Kliniki Tibbi Mərkəzin yaxınlığındakı hündürmərtəbəli binada güclü yanğın başlayıb.
Yanğının söndürülməsinə bir neçə yanğınsöndürən maşın cəlb olunub.
Nəsimi Rayon Polis İdarəsindən Trend-ə verilən məlumata görə, yanğın Qara Qarayev adına Uşaq Xəstəxanasının həyətində tikintisi başa çatmayan binada başlayıb.
Binanın mərtəbələrinin birində taxta materialları yanır.
İdarəyə xəsarət və ölüm faktı ilə bağlı məlumat daxil olmayıb.
Trend-in hadisə yerində olan əməkdaşının məlumatına görə, yanğın artıq söndürülüb.
Dövlət Yanğından Mühafizə Xidmətinin yanğın söndürmə qərargahının rəisi Əkbər Novruzov jurnalistlərə bildirib ki, yanğından mühafizə xidmətinə yanğın barədə məlumat təxminən 11:39-da daxil olub. Yanğın yerinə dərhal Nəsimi rayon Dövlət yanğından mühafizə hissəsinin bölmələri cəlb olunub. Yanğının mürəkkəbliyi nəzərə alınaraq 2-ci dərəcəli çağırış elan olunub.
Yanğın nəticəsində Səhiyyə Nazirliyinə məxsus yeni inşa olunan 13 mərtəbəli binanın yuxarı fasad hissəsi təxminən 200 kv metr hissədə yanıb.
Onun sözlərinə görə, yanğın 30 dəqiqə ərzində tam söndürülüb. Hazırda təhqiqat qrupu hadisə yerindədir. Yanğının baş vermə səbəbi araşdırılır.
Novruzov deyib ki, yanğın zamanı xəsarət alan olmayıb. Tikintidə çalışan 10 nəfərdən çox işçi təxliyyə olunub.
