Azərbaycan, Bakı, 30 yanvar /Trend, müxbir İ.İzzət/
Fövqəladə Hallar Nazirliyi (FHN) Bakıda çoxmərtəbəli binada baş vermiş yanğınla bağlı məlumat yayıb.
Trend nazirliyin rəsmi saytına istinadən xəbər verir ki, Bakı şəhəri, Sabunçu rayonunda 19 mərtəbəli yaşayış binasının 18-ci mərtəbəsində yaşayan vətəndaşa məxsus ümumi sahəsi 79 kv.m olan 2 otaqlı mənzilin 1 otağının və mətbəxinin yanar konstruksiyaları 30 kv.m sahədə yanıb. Mənzilin qalan hissəsi yanğından mühafizə olunub. Yanğın saat 14:42-də yanğınsöndürənlər tərəfindən söndürülüb.
Qeyd edək ki, Fövqəladə Hallar Nazirliyinin Dövlət Yanğın Nəzarəti Xidmətindən Trend-ə verilən məlumata görə, hadisə Sabunçu rayonu, Yavər Əliyev küçəsində yerləşən çoxmərtəbəli binalardan birində qeydə alınıb. İlkin məlumata görə, yanğın binanın 18-ci mərtəbəsində yerləşən mənzildə elektrik naqillərində baş vermiş qısa qapanmadan başlayıb.
Hadisə nəticəsində xəsarət alan olmadığı bildirilir.