Azərbaycan, Bakı, 10 sentyabr /Trend, müxbir Rufiz Hafizoğlu/
Türkiyə polisi ölkənin cənubundakı Adana vilayətində narkotik alverçilərinə qarşı xüsusi əməliyyata başlayıb.
Trend-in "Anadolu" agentliyinə istinadən verdiyi məlumata görə, xüsusi əməliyyatda 500-dən artıq polis iştirak edir. Əməliyyat çərçivəsində 20 nəfərin saxlandığı bildirilir.
Türkiyə Narkotiklərin və Narkomaniyanın Monitorinqi Mərkəzinin (TUBİM) açıqladığı rəqəmlərə görə, ölkədə narkotik istifadəçilərinin minimal yaşı 13, maksimal yaşı 65, orta yaşı isə 36-dır.
TUBİM-in məlumatında deyilir ki, 15-24 yaş arası narkotik istifadəçiləri ölkə əhalisinin 2,9 faizini, 25-44 yaş - 2,8 faiz, 45-64 yaş isə 2,3 faizini təşkil edir.
Mərkəzin məlumatına görə, 2013-cü ildə Türkiyədə 5214 nəfər narkotik asılılıqdan müalicə olunub. Ölkədə narkotiklərdən müalicə üzrə 22 mərkəz var.
Məlumata əsasən, Türkiyədə həbs olunanların 18 faizi narkotik alverçisi və narkotik maddə satanlardır ki, onların da sayı 23 738 nəfər təşkil edir.
Qeyd edək ki, son 4 ildə İstanbulda narkotik vasitələrin istifadəsinə və satışına görə 316 466 nəfər saxlanılıb.