Azərbaycan, Bakı, 06 iyun/ Trend , müxbir M.Əliyev/İran Dağlıq Qarabağ probleminin həlli üçün Rusiya və Ermənistana təsir vasitəsinə malik deyil. Azərbaycanın müstəqil politoloqu Vəfa Quluzadə belə hesab edir.
"İranın siyasəti Cənubi Qafqaz regionunda öz rolunun gücləndirilməsinə yönəlib", - İranın xarici işlər naziri müavininin bəyanatını şərh edən politoloq bildirib.
Dünən İran xarici işlər nazirinin müavini Əlirza Şeyx Əttar Bakıda bildirib ki, onun ölkəsi münaqişənin nizamlanmasında vasitəçi rolunu yenidən öz üzərinə götürməyə hazırdır. İranlı diplomat qeyd edib ki, İran ATƏT-in Minsk Qrupunun fəaliyyətini qənaətbəxş hesab etməsə də, bu çərçivədə aparılan danışıqları dəstəkləyir.
Quluzadə hesab edir ki, yalnız ABŞ-ın Azərbaycanın şimal qonşusuna təsir vastiələri var və münaqişə yalnız onun yardımı ilə həll ediləcək.
"Biz İrandan Dağlıq Qarabağ münaqişəsinin həllində vasitəçilik etməsini deyil, ədalətli mövqe gözləyirik, - Azərbaycan XİN mətbuat xidmətinin rəhbəri Xəzər İbrahim iranlı diplomatın bəyanatına cavab olaraq bildirib. Hazırki mərhələdə İranın vasitəçiliyi yalnız bir gümandır".
ABŞ-ın Azərbaycandakı səfirliyinin ictimai əlaqələr departamentinin rəhbəri Conatan Henik bildirib ki, "hansısa ölkə Dağlıq Qarabağ münaqişəsinin nizamlanması üzrə danışıqlarda vasitəçi olmağı arzulasa, bu yalnız münaqişə tərəflərinin icazəsi ilə baş verəcək".
İki Cənubi Qafqaz ölkəsiarasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Dağlıq Qarabağ və ona bitişik yeddi rayon - Azərbaycan ərazisinin 20 faizi Ermənistan Silahlı Qüvvələrinin işğalı altındadır. 1994-cü ilin mayında tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə, hələ ki nəticəsiz, sülh danışıqları aparılır.
Müəlliflə əlaqə saxlamaq üçün elektron ünvan [email protected]
