Azərbaycan, Bakı, 02 dekabr / Trend , müxbir E.Tariverdiyeva/
Aİ və ABŞ Cənubi Qafqaz regionunda vəziyyəti stabilləşdirməyi, Ermənistan və Azərbaycanla daha sıx tərəfdaşlıq əlaqələrini qaydaya salmağı qarşısına məqsəd qoyub. AFR-in Xarici Siyasət Şurasının "Rusiya-Avrasiya" mərkəzinin direktoru Aleksandr Rar belə hesab edir.
"Əgər Aİ və ABŞ həqiqətən də regionda geosiyası nüfuza sahib olmaq istəyirlərsə, Dağlıq Qarabağ münaqişəsi üzrə təkcə bir tərəfi dəstəkləyə bilməzlər, - Rar Berlindən telefonla Trend -a deyib. - Mən inanıram ki, ermənilərə faktiki olaraq Azərbaycanın işğal edilmiş ərazilərini qaytarmaqla bağlı ultimatum veriləcək. Bu hətta suala da səbəb olmur, çünki Yerevan özü də anlayır ki, torpaqları qaytarmaq lazımdır".
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
Son illər ərzində Qərbin bütün siyasəti məhz Tbilisiyə yönəlib. Lakin indi dəyişiklik vaxtı gəlib. Rarın fikrincə, Qərb Dağlıq Qarabağ münaqişəsinin həllində regionun bütün ölkələrinin dəstəyini əldə etməlidir. Birinci növbədə bu, Azərbaycanın işğal edilmiş ərazilərinin azad edilməsinə aiddir.
Lakin Rara görə, Dağlıq Qarabağın statusu üzrə qərar qeyri-müəyyən müddətə təxirə salınacaq.
"Rusiyanın təsirinə gəlincə, onun hazırda Bakı ilə enerji alyansının yaradılması və möhkəmləndirilməsi tendensiyası izlənilir. Alyansın taleyi Azərbaycan və Rusiyanın yaxşı əlaqələrindən asılı olacaq", - o hesab edir.
"Yaxın zamanlarda regiondakı vəziyyət dinamik şəkildə inkişaf edəcək və Türkiyə, fikrimcə, Qərbin təsiri altında Ermənistan-Türkiyə protokollarını ratifikasiya edəcək", - Rar deyib.
Oktyabrın 10-da Ankara-Yerevan protokolları İsveçrənin Sürix şəhərində Türkiyənin və Ermənistanın xarici işlər nazirləri Əhməd Davudoğlu və Edvard Nalbandyan tərəfindən imzalanıb.