Azərbaycan, Bakı, 12 may /Trend, müxbir K.Zərbəliyeva/
Azərbaycan Ermənistan Müdafiə Nazirliyinin Ermənistan və Azərbaycan qoşunlarının təmas xəttində dinc sakinin yaralanması barədə məlumatını təkzib edir.
Ermənistan Müdafiə Nazirliyinin göstərdiyi gün qoşunların təmas xəttinin cənub-şərq istiqamətində atəşkəs rejiminin pozulması qeydə alınmayıb və Azərbaycan tərəfi cavab atəşi açmayıb. Bunu cümə axşamı Trend-ə Azərbaycan Müdafiə Nazirliyinin mətbuat xidmətini rəis müavini Teymur Abdullayev bildirib.
Ermənistan KİV-i ölkənin Müdafiə Nazirliyinin mətbuat xidmətinə istinadən məlumat yayıb ki, mayın 11-də saat 18:05-də təmas xəttinin cənub-şərq istiqamətində Hadrut rayonu Kürataq kənd sakini, 33 yaşlı Araik Balasanyan traktorda işləyərkən başından yaralanıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.