...

Azərbaycan XİN rəhbəri Bakının Rusiya Prezidentinin Dağlıq Qarabağa dair təklifinə cavabını təqdim edib

Ermənistan-Azərbaycan münaqişəsi Materials 18 İyul 2011 13:47 (UTC +04:00)
Azərbaycanın xarici işlər naziri Elmar Məmmədyarov Moskvaya səfəri zamanı rəsmi Bakının Rusiya Prezidenti Dmitri Medvedevin Dağlıq Qarabağa dair təklifinə cavabını təqdim edib.
Azərbaycan XİN rəhbəri Bakının Rusiya Prezidentinin Dağlıq Qarabağa dair təklifinə cavabını təqdim edib

Trend-i buradan izləyin

Azərbaycan, Bakı, 18 iyul /Trend/

Azərbaycanın xarici işlər naziri Elmar Məmmədyarov Moskvaya səfəri zamanı rəsmi Bakının Rusiya Prezidenti Dmitri Medvedevin Dağlıq Qarabağa dair təklifinə cavabını təqdim edib. Trend-in məlumatına görə, bu barədə Rusiyanın xarici işlər naziri Sergey Lavrov deyib. Məlumatı "Rossiya 24" telekanalı yayıb.

Rusiyanın xarici işlər naziri Sergey Lavrov iyulun 8-də Azərbaycan və Ermənistan prezidentləri İlham Əliyev və Serj Sarkisyana RF Prezidenti Dmitri Medvedevin təklif və məktubunu təqdim edib.

"Rusiya ATƏT çərçivəsində ABŞ və Fransa ilə birgə münaqişə tərəflərinə problemin həllinin axtarışında kömək edir", - Lavrov azərbaycanlı həmkarı ilə birgə mətbuat konfransında deyib.

Azərbaycanın xarici işlər naziri hesab edir ki, danışıqlar prosesində heç də hər şey Azərbaycandan asılı deyil.

"Biz həmin təkliflərə Ermənistanın cavabını gözləməliyik, lakin hesab edirik ki, danışıqlarda irəliləyiş var, biz tədricən hamının hazırkı vəziyyətin heç kimi, eləcə də qonşularımızı qane etmədiyini anlayacağı həddə doğru irəliləyirik", - Məmmədyarov deyib.

Məmmədyarovun sözlərinə görə, region üçün, ilk növbədə, həm Azərbaycan, həm də Ermənistan üçün sabitlik vacibdir.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Xəbər lenti

Xəbər lenti