"Azərbaycan yolu" Siyasi Hərəkatı "Qarabağ" Ümumdünya Etiraz Aksiyaları çərçivəsində Cəbrayıl və Füzuli rayonlarının işğalının 13-cü ildönümü ilə bağlı bu gün İsveçin Stokholm şəhərində mitinq keçirilib. Bu barədə Trend ə siyasi hərəkatın İsveç nümayəndəsi Yaşar Göytürk məlumat verib.
Onun sözlərinə görə, Stokholmun "Sergelstrob" meydanında keçirilən mitinqdə 200-ə yaxın soydaşımız iştirak edib: "Etiraz aksiyasında azərbaycanlılarla yanaşı, türklər, Doğu Türküstandan olan türklər iştirak etdilər. Biz ermənilərin işğalı altında olan Azərbaycan torpaqlarının boşadılmasını, işağlçıların torpaqlarımızı tərk etməsini tələb etdik. Həmçinin işğalçıların Azərbaycan torpaqlarını yandırmasına, tarixi, mədəni abidələri dağıtmasına etirazlar bildirdik. Aksiyada "Ya Qarabağ, ya ölüm", "Erməni işğalçıları torpaqlarımızı tərk etsin!" şüarları səsləndirildi".
Y.Göytürkün sözlərinə görə, aksiyada çıxış edənlər ermənilərin təcavüzkar əməllərini, törətdikləri vəhşilikləri pisləyiblər. O bildirib ki, Ermənistanın işğal etdiyi Azərbaycan torpaqlarından qoşunlarını çıxarmasına dair BMT-nin 4 məlum qətnaməsinin yerinə yetirilməsi və dünya birliyi tərəfindən Ermənistanın işğalçı dövlət kimi tanınması tələbləri də səsləndirilib. Aksiyaların sonunda Azərbaycan və isveç dillərində qətnamə oxunub. Qətnamə İsveç Parlamentinə təqdim olunub.
Sənəddə Ermənsitanın Azərbaycan torpaqlarını işğal etməsi, bunun ağır nəticələri barədə məlumat verilir, işğalçıların torpaqlarımızdan çıxarılması üçün beynəlxalq təşkilatların Ermənistana təzyiqlər göstərməsi tələb edilir.
