Azərbaycan, Lənkəran / Trend , müxbir P.Əliyeva/ Türkiyənin Böyük Millət Məclisinin (Parlament) sədri Keksal Toptanın Azərbaycana səfəri dekabrın sonlarında gözlənilir. "Türkiyənin parlament sədrinin Azərbaycana rəsmi səfəri Qurban Bayramından sonra baş tuta bilər"- cümə günü Lənkəranda səfərdə olan Türkiyənin Azərbaycandakı səfir Hüseyn Avni Qarslıoğlu Trend in bölgə müxbirinin sualını cavablandırarkən bildirib.
Toptanın noyabrın 28-30-da Azərbaycana səfəri nəzərdə tutulmuşdu. Parlamentdən bildiriblər ki, səfər texniki səbəblərdən baş tutmayıb və qeyri-müəyyən vaxtadək təxirə salınıb.
Səfirin sözlərinə görə, Toptan Azərbaycana səfəri zamanı Azərbaycan parlamentinin sədri Oqtay Əsədovla görüşəcək.
Bu səfər Türkiyənin yeni parlament rəhbərinin xaricə birinci rəsmi səfəri olacaq.