Ukrayna, Kiyev / Trend müxbir Z.Novosvitskiy/ Ukrayna Ali Radasının deputatı, "GUAM-ın inkişafı Beynəlxalq fond" ictimai təşkilatının prezidenti Anatoli Matviyenko Trend ə müsahibəsində bəyan edib ki, Ukrayna parlamentində GUAM-ın inkişafı ilə bağlı fraksiyalararası birliyin yaradılması təşəbbüsü ilə çıxış etmək niyyətindədir.
Ukrayna bu vaxtadək "Demokratiya və iqtisadi əməkdaşlıq uğrunda təşkilat-GUAM"-ın nizamnaməsini ratifikasiya etməyib. Bu sənədin qəbulu məsələsi Ali Radada çoxluq təşkil edən Yuliya Timoşenko Bloku və "Bizim Ukrayna-Xalq Özünümüdafiə" fraksiyaları arasındakı koalisiya anlaşmasının bəndlərindən biridir.
"Belə bir təsisatın yaradılmasında məqsəd GUAM kimi instituta qanunvericilik səviyyəsində dəstək verməkdir" - deyə Matviyenko vurğulayıb.
Deputatın fikrincə, bu istiqamətdə real iş parlamentdəki vəziyyətin sabitləşməsindən sonra, yəni Rada və hökumət rəhbərliyinin seçilməsindən sonra başlayacaq.
"GUAM-ın inkişafı Beynəlxalq fond" 2007-ci ilin sentyabrında yaradılıb.