Azərbaycan, Bakı, 17 yanvar / Trend , müxbir E.Hüseynov/ Azərbaycanla sərhəddə, Türkiyənin İqdır əyalətində 13 il bundan qabaq tikintisi dayandırılmış aeroportun inşa olunması üçün 25 mln. dollar tələb olunur.
"Aeraportda tikinti işlərinin maliyyələşdirilməsi 2008-ci il Türkiyə dövlət büdcəsində nəzərdə tutulmayıb" - deyə cümə axşamı İqdır bələdiyyəsinin rəhbəri Nurəddin Aras Trend ə məlumat verib.
Azərbaycanlıların məskunlaşdığı Türkiyənin İqdır əyalətində aeroport tikintisi 1993-cü ildə başlanıb və işin 40 faizi həyata keçirildikdən sonra, vəsait çatışmazlığından işlər dayandırılıb. 2006-cı ildə Türkiyə hökuməti səviyyəsində, 2008-ci ilin maliyyə büdcəsindən vəsaitin ayrılması və artıq may ayında tikinti işlərinin bərpa olunması barədə qərar qəbul olunub.
Aras bildirib ki, bu ilin dövlət büdcəsində aeroport tikintisi üçün vəsait nəzərdə tutulmayıb və bunun səbəbləri məlum deyil. Lakin bələdiyyə rəhbəri ehtimal edir ki, maliyyələşdirmə hökumətin müxtəlif məqsədli proqramları üzrə həyata keçirilə bilər. "Bu baş verməsə, ümid edirik ki, 2009-2010-cu ilin büdcəsində İqdır aeroportu üçün vəsait nəzərdə tutulacaq" - deyə o bildirib.
İqdırlılar təyyarə uçuşları üçün Türkiyənin qonşu əyalətlərinin - Qars, Ərzurum və ya Ağrı aeroportlarına gedirlər. Azərbaycan paytaxtına gəlmək üçün yol nəqliyyatı ilə Naxçıvana (Azərbaycana), oradan isə Bakıya uçmalı olurlar.
"İqdırda aeropotun mövcud olması ilə yola az vaxt sərf olunacaq. Bu, iş adamları üçün çox mühümdür və iqtisadiyyatın inkişafına səbəb olacaq" - deyə bələdiyyə rəhbəri bildirib.
Onun sözlərinə görə, aeroportun açılması ilə Bakı və Gəncəyə birbaşa təyyarə reyslərinin həyata keçirilməsi və ticarət mübadiləsi mümkün olacaq.
