...

Azərbaycanın hakim partiyası maliyyə hesabatı verməyən partiyaların qeydiyyatının ləğvini istəyir

Siyasət Materials 7 Fevral 2008 11:20 (UTC +04:00)

Azərbaycan, Bakı, 07 fevral / Trend , müxbir Q.Cəbiyev/ Azərbaycanın hakim Yeni Azərbaycan Partiyası (YAP) hesab edir ki, maliyyə hesabatı verməyən siyasi partiyaların qeydiyyatı ləğv edilməlidir. "Maliyyə şəffaflığı məsələsi qanunvericilikdə çox sərt qoyulmalıdır və maliyyə hesabatı verməyən partiyaların qeydiyyatı belə ləğv edilməlidir" cümə axşamı Trend ə YAP Siyasi Şurasının üzvü, millət vəkili Aydın Mirzəzadə bildirib.

Milli Məclisin yaz sessiyasında 1992-ci ildə qəbul edilən "Siyasi partiyalar haqqında" qanuna əlavə və dəyişikliklərin olunacağı gözlənilir.

Mirzəzadə deyib ki, YAP yarandığı gündən qanunun tələblərinə uyğun olaraq, vaxtaşırı cəmiyyətə maliyyə hesabatı verir. Ancaq bunu digər partiyalar haqqında demək olmaz. "Əgər siyasi partiyanın lideri heç bir işdə çalışmırsa, ancaq partiya işi ilə məşğul olursa, qərargahda bir neçə insan çalışırsa, partiyanın qəzeti çıxırsa, partiyanın funksionerləri vaxtaşırı tədbirlərdə iştirak edirlərsə, bütün bunlar onu göstərir ki, o partiyanın müəyyən maliyyəsi var. Həmin maliyyənin hesabatını verməlidirlər" YAP-çı deputat əlavə edib. Onun sözlərinə görə, hakimiyyətə iddialı olan partiyanın fəaliyyəti şəffaf olmalı, maliyyə hesabatı verməlidir.

Azərbaycanın müxalif Müsavat Partiyası İcra Aparatının rəhbəri Arif Hacılı isə bildirib ki, partiyanın fəaliyyəti ilə bağlı maliyyə hərəkətləri barədə məlumatlar verməsi qeyri-mümkündür. Çünki partiyada hazırda maliyyə hərəkəti yoxdur. Əməkhaqqı verilmir, partiyanın hesabına kimlərsə pul köçürmür və insanlar ictimai əsaslarla fəaliyyət göstərirlər.

Müxalif Xalq Cəbhəsi Partiyasının (AXCP) sədr müavini Nurəddin Məmmədi də müxalifətin qaranlıq mənbələrdən maliyyələşməsi ittihamını qəbul etmir. Onun fikrincə, maliyyə mənbəyi olsaydı, partiyalar maliyyə baxımından çətin durumda olmazdı.

Xəbər lenti

Xəbər lenti