Azərbaycan, Bakı, 08 fevral / Trend , müxbir İ.Əlizadə/ Azərbaycan Bakının statusunun müəyyənləşdirilməsi və paytaxtda mer seçkilərinin keçirilməsi ilə bağlı Avropa Şurası qarşısında öhdəlik götürməyib və bu məsələlərin həyata keçirilməsi məcburi xarakter daşımır. "Bakının statusunun müəyyənləşdirilməsi və mer seçkilərinin keçirilməsi aktual məsələ deyil. Bakının hazırkı sturuktur əsasında idarəedilməsi beynəlxalq təşkilatlarda heç bir narahatçılıq doğurmur" - deyə Trend ə açıqlamasında Azərbaycanın Avropa Şurası Parlament Assambleyasındakı (AŞPA) nümayəndə heyətinin rəhbəri Səməd Seyidov bildirib.
AŞPA-nın Azərbaycan üzrə həmməruzəçiləri Andres Herkel və Yevgeniya Jivkova fevralın 4-dən 7-dək Bakıda səfərdə olublar. Həmməruzəçilər keçirdikləri görüşlərdə Bakının statusunun müəyyənləşdirilməsi və paytaxtda mer seçkilərinin keçirilməsi məsələlərini də müzakirə ediblər. Avropa Şurasının Yerli və Regional Hakimiyyətlər Konqresi Bakının statusunun tezliklə müəyyənləşdirilməsi və mer seçkilərinin keçirilməsinə dair tövsiyə verib.
Nümayəndə heyətinin rəhbəri qeyd edib ki, Azərbaycan Avorpa Şurası qarşısında konkret öhdəliklər götürüb və onların yerinə yetiriliməsi məcburi xarakter daşıyır: "Öhdəliklər arasında Bakının statusunun müəyyənləşdirilməsi və mer seçkilərinin keçirilməsi məsələsi yoxdur. Avropa Şurası beynəlxalq təşkilatdır və beynəlxalq təşkilatların əsas vəzifə və fəaliyyətlərindən biri müxtəlif məsələlərlə bağlı yeni təkliflər irəli sürməkdir. Lakin heç bir ölkə, o cümlədən Azərbaycan Avropa Şurasının bütün ideya və təkliflərini qəbul edə bilməz".
O qeyd edib ki, ölkədə mövcud olan strukturun dəyişdirilməsi, yenisinin yaradılması ilə bağlı beynəlxalq təşkilatlar təklif irəli sürə bilərlər: "Lakin həmin təklifin dövlətin maraqlarına uyğun olub-olmadığı araşdırılmalıdır. Əgər təklif Azərbaycanın maraqlarına uyğun deyilsə və hansısa problemlər yaradırsa, o, qəbul oluna bilməz".
