Azərbaycan, Bakı, 20 fevral / Trend , müxbir / R.Abdullayev, R.Hafizoğlu/ Fələstində mübərizə aparan "İslami cihad" sonadək İsraillə mübərizə aparmaqda, İsrail isə, öz ərazilərini müdafiə etməkdə israrlıdır.
"İsrail öz vətəndaşlarını terror aktlarından müdafiə etmək üçün bütün lazımi tədbirləri görür"- deyə, çərşənbə günü İsrail XİN-in rəsmi nümayəndəsi Eddi Şapir Trend -ə bildirib.
KİV-in verdiyi məlumata görə, ərəb ölkələrinin xüsusi kəşfiyyat orqanları Fələstində mübarizə aparan "Həmas" və "İslami cihad" liderləri haqda gizli məlumatları İsrail kəşfiyyatına ötürürlər.
Fevralın 16-da İsrail hərbi hava qüvvələrinin raket zərbəsi nəticəsində, "İslami Cihad " təşkilatının liderlərindən olan Əymən Fayed və ailə üzvləri həlak olublar.
Diplomatın fikrincə, dünyanın heç bir ölkəsi İsrailin cənubundakı dinc vətəndaşların raket atəşinə tutulması ilə müşayiət olunan amansız Fələstin terroruna dözməz. "İsrail, digər ölkələr kimi, fundamental islam terroru ilə mübarizə aparır. Məhz buna görə İsrailin hərbi və siyasi rəhbərliyi bütün üsullardan istifadə etmək məcburiyyətindədir" - deyə, Şapir bildirib.
İsrail rəsmisinin fikrincə, bu lazımi və legitim addımlara terror infrastrukturu liderlərinin məhvi də daxildir. "Bu, terror təşkilatlarının mənfur və təhlükəli liderlərinə qarşı mübarizədə bizim strateji seçimimizdir" - deyə, İsrail XİN-in rəsmi nümayəndəsi vurğulayıb.
Şapir "Hizbullah" şiə qrupunun hərbi qanadının Dəməşqdə qətlə yetirilmiş liderlərindən biri olan İmad Muqniyənin ölümünə İsrailin adidiyyatını rəsmi olaraq rədd edib. Lakin o Muqniyənin çoxsaylı cinayətlərə görə cavabdeh və qəddar qatil olduğunu qeyd edib.
"İslami cihad" ın yeni rəhbəri Xalid Batş Trend ə bildirib ki, bu təşkilat liderlərə yox, prinsiplərə bağlıdır və onların qətli Fələstindəki mübarizənin qarşısını ala bilməz. Onun fikrincə, "Həmas" və mübərizə aparan digər qrupların liderlərini qətlə yetirmək istəyi İsrailin terrorçu dövlət olmasını bir daha təsdiqləyir.
""Həmas" və "İslami cihad" liderlərinin qətli ilə İsrail heç nə əldə etməyəcək" - deyə, Batş çərşənbə günü Fələstindən telefonla bildirib. O hesab edir ki, İsrail, "İslami Cihad" lideri Fayedi, "Hizbullah" lideri İmad Muqniyəni ərəb dövlətlərinin kəşfiyyat orqanları ilə əməkdaşlıq vasitəsilə qətlə yetirib.
" İsrail hökümətinin hələ də dərk etmədiyi bir həqiqət var; bizlər üçün ən uca və ali məqam şəhidilikdir. Bizi olümlə qorxutmaq mənasızdır"-deyə, o qeyd edib. Batş hesab edir ki, ərəb ölkələrinin liderləri və xüsusi xidmət orqanları İsraillə əməkdaşlıqdan əl çəkməlidirlər.
"Bəzi ərəb dövlətlərinin liderləri İsraillə açıq şəkildə əməkdaşlıq edirlər.Onların bu əməkdaşlığı nəinki fələstinlilərin maraqlarına, hətta idarə etdikləri dövlətlərin də maraqlarına ziddir" -deyə, Batş qeyd edib.
Qəzzədəki İslam Universitetinin dekanı, həmasyönlü politoloq İsam Məhəmməd də, müqavimət göstərən təşkilatların liderlərin qətlinin İsrailə heç bir fayda verəməyəcəyini bildirib. "Liderlərin qətli mübərizə aparan təşkilatların siyasi nüfuzunu gücləndirir"-deyə, çərşənbə günü Məhəmməd Qəzzədən telefonla Trend ə bildirirb.
Onun fikrincə, İsrail müqavimət liderlərini qətlə yetirməklə, sadə xalqda ümidsizlik yaratmaq istəyir.
Fevralın 11- də İsrailin müdafiə naziri Ehud Barak, ölkəsinin Fələstindəki İslami Müqavimət Hərəkatı "Həmas" və digər radikal qruplara qarşı hava zərbələri endirəcəyini bildirib.
Məqalə müəllifi ilə rufiz ünvanı ilə əlaqə saxlamaq olar.
