Azərbaycan, Bakı, 29 fevral / Trend , müxbir Q.Cəbiyev/ Azərbaycanda 3 il öncə yaradılan müxalifətin 16 Oktyabr Hərəkatı fəaliyyətini tam dayandırıb. Bu barədə cümə günü Trend "a Hərəkatın yaradıcılarından olan, Azərbaycan Demokrat Partiyasının (ADP) sədri Sərdar Cəlaloğlu məlumat verib.
16 Oktyabr Hərəkatı 2003-cü il prezident seçkisi zamanı Bakıda törədilən iğtişaşlara görə, həbs edilən millət vəkilləri Pənah Hüseyn, İqbal Ağazadə, Müsavat Partiyasının funksionerləri Arif Hacılı, İbrahim İbrahimli, Rauf Arifoğlu, ADP sədri Sərdar Cəlaloğlu və Qarabağ Qaziləri İctimai Birliyinin rəhbəri Etimad Əsədov tərəfindən yaradılmışdı. 2005-ci ilin əvvəllərində yaradılan Hərəkatın qarşısında siyasi proseslərdə birgə iştirak və bir sıra başqa vəzifələr dayanırdı.
Cəlaloğlu deyib ki, qurumun qarşısında duran vəzifələr aktuallıq kəsb etmədiyindən fəaliyyətini dayandırıb. O əlavə edib ki, Azərbaycanda oktyabrda keçiriləcək prezident seçkiləri ilə bağlı Hərəkat üzvlərinin yenidən bir araya gəlməsi planlaşdırılmır.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
