Azərbaycan, Bakı, 05 mart / Trend , müxbir S.İlhamqızı/ Azərbaycanın müxalifət partiyalarının rəhbərləri prezident seçkisi öncəsi vəziyyət barədə ABŞ dövlət katibinin müavininin köməkçisi, Minsk qrupunun amerikalı həmsədri Metyu Brayzaya məlumat veriblər. Bu barədə Trend ə Azərbaycan Demokrat Partiyasının sədri Sərdar Cəlaloğlu məlumat verib.
Azərbaycanda səfərdə olan Brayza çərşənbə günü siyasi pavrtiyaların liderləri - ADP sədri Sərdar Cəlaloğlu, Ümid Partiyasının sədri İqbal Ağazadə, Vətəndaş Həmrəyliyi Partiyasının sədri Sabir Rüstəmxanlı, Demokratik İslahatlar Partiyasının sədri Asim Mollazadə, Liberal Partiyanın sədr əvəzi Əvəz Temirxan və Azərbaycan Xalq Cəbhəsi Partiyasının sədri Əli Kərimli ilə görüş keçirib.
Görüşdə müxalifət təmsilçiləri qarşıdan gələn prezident seçkisində iştirak, seçkiöncəsi vəziyyət, müxalifətin kütləvi tədbirlər keçirə bilməməsi barədə açıqlamalar veriblər.
Brayza ilə görüşdə partiya rəhbərlərinin hər biri prezident seçkisində iştirak və seçkiöncəsi vəziyyətə dair öz partiyasının mövqeyini çatdırıb.
Həmçinin Qarabağ problemi, Ermənistanın işğalçılıq siyasətini davam etdirməsi barədə fikirlər səsləndirilib.
"İrəvanda daxili iğtişaşlar törətmiş cinayətkar hakim rejim diqqəti Ermənistan daxilindəki problemlərdən yayındırmaq üçün Qarabağda atəşkəs rejimini pozur". Bu fikirləri Demokratik İslahatlar Partiyasının sədri, millət vəkili Asim Mollazadə bildirib. O qeyd edib ki, Ermənistanda prezident sezkilərindən sonra yaranmış gərginlik Dağlıq Qarabağ münaqişəsinə də təsirsiz ötüşmür. Millət vəkilinin fikrincə, ermənilərin münaqişə zolağında təcavüzü davam etdirməsi bölgədə sülhün pozulmasına xidmət edir.
Brayza ilə görüşdə partiya rəhbərlərinin hər biri prezident seçkisinə və seçkiöncəsi vəziyyətə dair öz partiyasının mövqeyini çatdırıb.
